Маълум бўлишича, Тошкент вилоятидаги МЧЖнинг муқаддам судланган ходими Навоий вилоятидаги хусусий корхона иш бошқарувчисининг ишончига кириб, 2025–2026 йилларда гўёки 20 млрд сўмлик товар айланмаси мавжудлиги ҳақида қалбаки ҳужжатлар тайёрлашни таклиф қилган.

У солиқ органларидаги танишлари орқали 2 млрд сўм ҚҚСни қайтариб беришини айтиб, бу «хизмат» учун 340 млн сўм талаб қилган.

Схемада унинг шериги — Андижон шаҳрида яшовчи якка тартибдаги тадбиркор ҳам иштирок этган. У ўзаро таниш корхоналар ўртасида сохта электрон шартномалар расмийлаштириб, умумий қиймати 18 млрд 670 млн сўм бўлган қурилиш-монтаж ишлари, транспорт хизмати ва қурилиш материаллари етказиб берилгани ҳақида 10 та сохта ҳисоб-фактура шакллантирган. Шу орқали бюджетдан 2 млрд сўм ҚҚС қайтарилишига эришилган.

Шундан сўнг, талаб қилинган 340 млн сўмни жиноий шериклар орқали олиш вақтида улар қўлга олинди. Ушбу маблағ ўзаро тақсимланиши режалаштирилгани маълум бўлди.

Ҳолат юзасидан тўрт нафар шахсга нисбатан Жиноят кодексининг тегишли моддалари билан жиноят иши қўзғатилди. Айни пайтда ушбу схемада иштирок этган бўлиши мумкин бўлган солиқ органлари ходимларини аниқлаш бўйича тергов ҳаракатлари давом этмоқда.