Мурожаат матни унинг тарафдорлари томонидан ижтимоий тармоқларда эълон қилинди. Бу ҳақда “24.kg” хабар берди.
Ташиев ишдан олинганидан сўнг унинг бир неча кун аввал Германияга даволаниш учун кетгани ҳақида хабарлар тарқалганди. Манбаларга кўра, у юрак оғриғидан шикоят қилган ва тиббий муолажага муҳтож бўлган. Ташиевнинг ўзи ҳам бу маълумотни тасдиқлаб, аввал ўтказилган жарроҳлик амалиётидан кейин президент рухсати билан хорижга текширувдан ўтиш учун кетганини айтди.
Ишдан бўшатиш қарори унинг учун кутилмаган воқеа бўлганини ҳамда давлат раҳбарининг қарорини бажариш зарурлигини таъкидлади.
“Давлатимизга, халқимизга, президентимизга астойдил хизмат қилдим ва бу билан фахрланаман. Фақат бир нарсадан афсусланаманки, менга шахсий таркиб билан хайрлашишга имкон берилмади. Миллий хавфсизлик давлат қўмитасининг ҳар бир ходимига миннатдорлик билдираман ва муваффақият тилайман”, дейилади мурожаатда.
Сўзининг якунида Қамчибек Ташиев фуқароларни қонунга риоя қилишга ва ноқонуний хатти-ҳаракатларга йўл қўймасликка чақириб, мамлакатда тинчлик ва барқарорликни сақлаш муҳимлигини таъкидлади.
Маълумот ўрнида, Ташиевнинг ўрнига Жумгалбек Шабданбеков Миллий хавфсизлик давлат қўмитаси раиси вазифасини бажарувчи этиб тайинланди. Унинг номзоди МХДҚ раиси лавозимига тасдиқлаш учун Қирғизистон Жўқорғи Кенешига киритилади. Президент Садир Жапаров Ташиевни ишдан олиш сабабини қуйидагича изоҳлади:
“Авваламбор, мен бу қарорни давлатимиз манфаатларини кўзлаб, жамиятда, шу жумладан, давлат тузилмалари ўртасида бўлинишга йўл қўймаслик, бирдамликни мустаҳкамлаш мақсадида қабул қилдим”, дея унинг сўзларини келтирди матбуот котиби.
Қамчибек Ташиев 2020 йил 16 октябрда Қирғизистон Миллий хавфсизлик давлат қўмитаси раиси этиб тайинланган эди. Фармонни 2020 йил 5 – 6 октябрь воқеаларидан кейин президент вазифасини бажарувчи Садир Жапаров имзолаган. Ташиевдан ташқари Миллий хавфсизлик давлат қўмитаси раисининг уч нафар ўринбосари ҳам ишдан олинган, деб хабар берди daryo.uz.
