Ишчи гуруҳ Қарши туман кичик саноат зонаси фаолияти билан яқиндан танишди. Ҳудудда электротехника саноати корхоналари томонидан бугунги кунда ишлаб чиқарилаётган маҳсулотлар ички бозор талабини қондирмоқда. Шунингдек, маҳаллий маҳсулотларни келгусида хорижга экспорт қилиш ҳам режалаштирилган.
Жумладан, савдо терминаллари (инфокиоска) ишлаб чиқаришга ихтисослашган “Promax” масъулияти чекланган жамияти корхонасида 2 миллиард 500 миллион сўмлик лойиҳа амалга оширилмоқда. Шундан 50 минг АҚШ доллари хорижий инвестиция ҳисобига тўғри келади. Бугунги кунда корхонада 15 нафар мутахассис меҳнат қилмоқда. Йиллик қуввати минг дона бўлган савдо терминаллари бугун республикамизнинг барча нуқталарида хизмат кўрсатмоқда. Яқин келажакда мазкур маҳсулотларнинг қарийб 30 фоизини МДҲ давлатларига экспорт қилиш кўзда тутилган.
Уюшма ишчи гуруҳи корхонани қайта фаолият бошлаши ва унинг фаолиятини халқаро талабларга мос даражага кўтариш учун ҳар томонлама қўллаб-қувватламоқда ва доимий тарзда амалий ёрдам кўрсатиб келмоқда. Хусусан божхона, солиқ ва банк кредитлари тўлови, корхона маҳсулотларини экспортга йўналтириш, маркетинг тадқиқотлари, бозорларни ўрганиш, хорижий инвесторларни жалб этиш, янги инвестицион лойиҳалар устида ишлашга оид масалаларда кўмаклашаётгани шулар жумласидандир.
Ҳудудларда инвестицион, саноат ва экспорт салоҳиятини татбиқ этиш ҳамда иқтисодий ривожланишни рағбатлантириш бўйича комплекс чора-тадбирларни ишлаб чиқиш мақсадида ташкил этилган шундай тадбир ва саъй-ҳаракатлар республика бўйлаб давом этмоқда.
