Тадқиқот давомида тадқиқотчилар иштирокчиларнинг саломатлиги ва турмуш тарзига оид маълумотларни тўплашди ва таҳлил қилишди. Маълум бўлишича, уларнинг 902 нафарида деменция ташхиси қўйилган. Бундан ташқари, 2,5 минг кишида енгил когнитив бузилишлар қайд этилди. Шу билан бирга, муаммолар аниқланган одамларнинг аксарияти бутун ҳаёти давомида жисмоний оғир ишлар билан шуғулланган.
Яна бир қатор ҳисоб-китобларни амалга оширгандан сўнг, олимлар оғир иш билан шуғулланадиган одамларда деменциянинг ривожланиш эҳтимоли бошқа гуруҳларга қараганда деярли 15,5 фоизга юқори деган хулосага келишди.
Тадқиқот муаллифларининг таъкидлашича, кассирлар, сотувчилар, кичик тиббиёт ходимлари, фермерлар ва чорвадорлар ушбу касалликка йўлиқишга кўпроқ мойил бўлишади. Ушбу касб вакиллари кўроқ вақтини тик оёқда ўтказади. Уларда доимий руҳий зўриқиш ва чарчаш хавфи ортади.
Олимларнинг қўшимча қилишича, ўз вақтида дам олиш имкониятининг йўқлиги ва бўш вақтнинг етишмаслиги когнитив қобилиятларга таъсир қилади. Бу омиллар тананинг чарчашига олиб келади ва мия фаолиятига салбий таъсир қилади, деб хабар беради mir24.tv.
Деменция, бу – хотира, фикрлаш ва кундалик фаолиятни амалга ошириш қобилиятига салбий таъсир кўрсатадиган бир нечта касалликларни тавсифловчи атама. Деменция вақт ўтиши билан ривожланади. Бу асосан кекса одамларда юзага келади, лекин ҳамма кексайган одамларга ҳам деменция ривожланмайди.
