Адлия вазирлигида қонунчилик ҳужжатлари ва улар лойиҳаларини коррупцияга қарши экспертизадан ўтказиш, аниқланган коррупциявий омилларни бартараф этиш бўйича амалга оширилаётган ишлар натижаларини жамоатчиликка етказиш ҳамда экспертиза жараёнларини янада такомиллаштиришга оид таклифларни муҳокама қилиш мақсадида очиқ мулоқот ўтказилди.
Очиқ мулоқотда парламент аъзолари, Бош прокуратура, Коррупцияга қарши курашиш агентлиги, вазирлик ва идоралар, нодавлат нотижорат ташкилотлари, тадбиркорлик субъектлари, оммавий ахборот воситалари вакиллари ва блогерлар иштирок этди.
Мутахассислар Ўзбекистонда 2020-2021 йилларда коррупцияга қарши экспертизага оид бир қатор ижобий янгиликлар бўлганлигини, хусусан Адлия вазирлигида коррупцияга қарши экспертизадан ўтказиш бўйича алоҳида бўлим ташкил этилганлигини, қонунчилик ҳужжатлари лойиҳаларини коррупцияга қарши экспертизадан ўтказиш мажбурий этиб белгиланганлигини, коррупциявий омилларни аниқлаш бўйича чеклист жорий этилганлигини, адлия органлари томонидан 2021 йилда 500 та амалдаги норматив-ҳуқуқий ҳужжатларни коррупцияга қарши экспертизадан ўтказиш режаси тасдиқланиб амалга оширилаётганлигини соҳадаги жиддий ўзгаришлар сифатида эътироф этди.
Тадбирда Адлия вазирлиги томонидан 2021 йилнинг биринчи чорагида ўтказилган қурилиш, соғлиқни сақлаш, олий таълим ва давлат харидлари соҳаларига оид амалдаги норматив-ҳуқуқий ҳужжатларнинг коррупцияга қарши экспертизаси натижалари таҳлил қилинди ва кенг муҳокама қилинди.
Экспертиза натижалари бўйича юқоридаги соҳаларни тартибга солувчи 226 та қонунчилик ҳужжатларининг 75 тасида (33 фоизи) 302 та коррупциявий омиллар мавжудлиги аниқланган. Хусусан, қурилиш соҳасидаги 44 та қонунчилик ҳужжатларининг 23 тасида (52 фоизи) 124 та, соғлиқни сақлаш соҳасидаги 70 та қонунчилик ҳужжатларининг 13 тасида (19 фоиз) 41 та, олий таълим соҳасидаги 96 та қонунчилик ҳужжатларининг 27 тасида (28 фоизи) 91 та, давлат харидлари соҳасидаги 16 та қонунчилик ҳужжатларининг 12 тасида (75 фоиз) 46 та коррупциявий омиллар аниқланган. Энг муҳими, коррупциявий омилларни бартараф этиш бўйича йўл харитаси ишлаб чиқилган.
Шунингдек, очиқ мулоқотда коррупцияга қарши экспертизадан ўтказиш тизимининг муаммоли жиҳатлари ва тизимда жорий этилган янги тартиб доирасидаги ўзгаришлар ҳақида фикр-мулоҳазалар билдирилди.
Шу билан бирга, коррупциявий нормалар ҳақида ҳабар бериш учун ташкил этилган “adliya_korrupsiyasizqonun_bot” телеграм ботининг тақдимоти ўтказилди.
Тадбир якунида норматив-ҳуқуқий ҳужжатларда коррупциявий омилларни аниқлаш ва бартараф этиш учун келгусида амалга оширилиши лозим бўлган чора-тадбирлар белгилаб олинди.
Билдирилган таклифлар Адлия вазирлиги томонидан ишлаб чиқилаётган Ўзбекистон Республикаси Президентининг қонунчилик ҳужжатларида коррупциявий омилларни аниқлаш ва бартараф этишга қаратилган қарор лойиҳасида инобатга олинишига келишиб олинди, деб хабар беради Адлия вазирлиги жамоатчилик билан алоқалар бўлими.
