Маълум қилинишича, Давлат хавфсизлик хизмати ходимлари Ички ишлар ва божхона органлари билан ҳамкорликда ўтказган тезкор-қидирув тадбирлари давомида қўшни давлатдан контрабанда йўли билан олиб келинган катта миқдордаги наркотик модда тўхтатиб қолинган.

Текширув жараёнида Марғилон шаҳрида яшовчи, 1973 йилда туғилган, муқаддам наркожиноят учун судланган шахс кузатувга олинган. У қирғизистонлик танишлари томонидан Хўжаобод туманида яшириб кетилган 24 кг 475 грамм «гашиш» моддасини қабул қилиб олаётган вақтида ашёвий далиллар билан ушланган.

Мазкур ҳолат юзасидан унга нисбатан Ўзбекистон Республикаси Жиноят кодексининг 28, 246-моддаси (контрабанда) 2-қисми ҳамда 25, 273-моддаси (гиёҳвандлик воситалари ва психотроп моддаларни ўтказиш) 5-қисми билан жиноят иши қўзғатилиб, «қамоқ» эҳтиёт чораси қўлланилди.

Ҳозирда тергов ҳаракатлари давом эттирилиб, ушбу жиноятга алоқадор бошқа шахсларни аниқлаш ишлари олиб борилмоқда.