2026 йил 22 апрель куни Россия Федерацияси Ички ишлар вазирлиги ходимлари кўмагида ота-оналари депортация қилингани сабаб чет элда қаровсиз қолган 3 нафар вояга етмаган бола Ўзбекистонга олиб келинди.
Болалар Ислом Каримов номидаги Тошкент халқаро аэропорти орқали пойтахтга етиб келди.
Улар дастлаб Тошкент шаҳар ИИББ ҳузуридаги вояга етмаганларга ижтимоий-ҳуқуқий ёрдам кўрсатиш марказига жойлаштирилиб, зарур тиббий ва ижтимоий ёрдам билан таъминланди.
Маълум қилинишича, тезкор мувофиқлаштириш ишлари натижасида, оилага жойлаштириш устуворлиги асосида 3 нафар бола ўша куннинг ўзида ўз оилаларига топширилди.
Қайд этилишича, жорий йил бошидан буён Россия ҳудудидан жами 40 нафар вояга етмаган бола Ватанга қайтарилиб, ўз оилаларига етказилган.
