Россия Президенти Владимир Путин Вазирлар маҳкамаси олдига мамлакат аҳолисининг 60 фоизини гриппга қарши эмлаш вазифасини қўйди. Бунда вакцина касалликка мойил шахсларнинг 75 фоизига етиши керак. Шунингдек, тегишли вакциналар рўйхатдан ўтказилганидан кейин янги коронавирус инфекциясига қарши эмлашга ҳам маблағ ажратиш керак бўлади.
Давлат раҳбари бу ва бошқа топшириқларни 29 июлда бўлиб ўтган Соғлиқни сақлаш тизимининг куз-қиш даврида эпидемиологик мавсумга тайёр эканлигига бағишланган йиғилиш якунида юклади.
Шунингдек, ҳукумат учун, жумладан, коронавирус инфекцияси билан касалланганларни даволаш ва уларни индивидуал ҳимоя воситалари ва керакли ускуналар билан таъминлаш учун маблағ ажратиш вазифаси ҳам долзарблигича қолади.
Ҳукуматга куз-қиш даврида инфекцияга қарши кураш учун етарли ҳажмда дори воситалари ишлаб чиқарилаётгани ва улар билан Россия бозори таъминланишини назорат қилиш вазифаси юклатилди, деб хабар беради Российская газета.
