Ғўзага бугун сифатли ишлов берилмаса, эртага кутилган ҳосилни олиб бўлмайди. Буни дилдан ҳис этган самарқандлик тажрибали деҳқонлар 2021 йил ҳосили учун 75 минг 356 гектар ер майдонига экилган ғўзани биринчи комплекс культивация қилиш ишларини бошлаб юборишди.
“Ўзагроинспекция”нинг Самарқанд вилоят бошқармаси ва туманлар бўлимлари томонидан ўтказилаётган кунлик мониторинг-таҳлилларга эътибор қаратилса, ғўза парваришида ўта муҳим агротехник тадбир ҳисобланган культивацияда мавжуд 1 минг 612 та культиваторлардан унумли фойдаланилмоқда.
2021 йилнинг 26 апрель ҳолатига кўра, вилоятда жами 74 минг 207 гектар ер майдонидаги чигит униб чиқди. Айни кунларда бир кунда ўртача 3 минг 265 гектар ғўза майдонларига сифатли тарзда биринчи ишлов берилмоқда.
Хусусан, Каттақўрғон туманидаги 10 минг 750 гектар ерга экилган чигит қатор орасига бир кунда 328 гектари, Нарпай туманида 10 минг 762 гектар ер майдонининг 656 гектари, Пахтачида 8 минг 195 гектар ерга экилган чигитнинг 360 гектари, Иштихон туманида 8 минг 620 гектар ерга экилган чигитнинг 368 гектарига сифатли тарзда биринчи комплекс ишлов берилмоқда.
Мазкур агротехник тадбирлар “Ўзагроинспекция”нинг Самарқанд вилоят бошқармаси ва туманлар бўлимлари томонидан каттиқ назорат остига олинди.
Шу ўринда айтиш жоизки, ғўзага биринчи комплекс ишлов бериш, ҳосилдорликнинг юқори бўлишини таъминлайди. Бободеҳқон таъбири билан айтганда, кутилаётган ҳосилнинг тақдири айнан шу дамларда ҳал этилади. Шу боис, ушбу агротехник тадбир ўз вақтида ва сифатли ўтказилса, ғалвир сувдан кўтарилганда барчамизнинг юзимиз ёруғ бўлади.
Абдували Худоёров,
“Ўзагроинспекция”нинг Самарқанд вилоят бошқармаси
ахборот хизмати
