Тадбирдан кўзланган асосий мақсадлар — наркотикларнинг ноқонуний айланмасига қарши кураш самарадорлигини ошириш, илғор халқаро тажрибани ўрганиш ва амалиётга жорий этиш, замонавий таҳдидларга қарши комплекс ёндашувларни ишлаб чиқиш ҳамда давлатлараро ҳамкорликни мустаҳкамлашдан иборат.

Форумда БМТ, Интерпол, Европа Иттифоқи, Шанхай ҳамкорлик ташкилоти, Мустақил Давлатлар Ҳамдўстлиги, Жаҳон божхона ташкилоти каби 20 дан ортиқ нуфузли халқаро тузилмалар, 50 га яқин давлатдан ҳуқуқни муҳофаза қилувчи органлар раҳбарлари ҳамда 500 га яқин эксперт ва мутахассислар иштирок этиши кутилмоқда.

Шунингдек, форум доирасида ёшлар саммити ҳам ташкил этилиб, унда ёшлар ўртасида гиёҳвандликнинг олдини олиш, соғлом турмуш тарзини тарғиб этиш, ижтимоий фаолликни ошириш ва уларнинг глобал муаммолар ечимидаги иштирокини кучайтириш масалалари муҳокама қилинади.

Форум давомида наркотик воситалар ноқонуний айланмасининг глобал ва минтақавий тенденциялари, ёшлар ва вояга етмаганлар ўртасида профилактика тизимини такомиллаштириш, даволаш ва реабилитация жараёнларини ривожлантириш, шунингдек, рақамли технологиялар ва сунъий интеллектдан самарали фойдаланиш масалалари атрофлича кўриб чиқилади.

Мазкур анжуман халқаро ҳамкорлик механизмларини кенгайтириш, наркотаҳдидларга қарши курашда ягона ёндашувларни шакллантириш ҳамда Ўзбекистоннинг халқаро майдондаги нуфузини янада мустаҳкамлашга хизмат қилиши кутилмоқда.