Ўзбекистон билан Фаластин ўртасидаги кўп томонлама хусусан, иқтисодий, маданий-гуманитар соҳалар ҳамда парламентлараро алоқаларни ривожлантириш масалалари кўриб чиқилди.
Суҳбат давомида савдо-иқтисодий муносабатлар икки томонлама ҳамкорликнинг муҳим йўналишларидан эканлиги, шу нуқтайи назардан қишлоқ хўжалиги ва саноат маҳсулотларини ишлаб чиқариш, фармацевтика ва тўқимачилик соҳаларида қўшма лойиҳаларни йўлга қўйиш зарурлиги таъкидланди.
Сенат Раиси турли даражаларда ўзаро ташрифларни ташкил этиш ва тажриба алмашиш орқали Фаластин ва Ўзбекистон ўртасидаги алоқалар салоҳиятини кучайтириш таклифини билдирди. Жумладан, икки давлат парламентлари ўртасида конструктив мулоқотни ўрнатиш ва парламентлараро яқин алоқаларни ривожлантиришга эътибор қаратилди. Бунда тегишли қўмиталар ўртасида томонларни қизиқтирган ўзаро манфаатли соҳаларда мулоқот ўрнатиш, парламентлараро алоқанинг муҳим механизмларидан бири ҳисобланган “дўстлик гуруҳлари”ни шакллантириш юзасидан фикр алмашилди.
Учрашув якунида халқаро парламент тузилмалари (Парламентлараро иттифоқ, Араб парламенти) ва бошқа қатор халқаро ташкилотлар доирасида ўзаро ташаббусларни қўллаб қувватлаш анъанасини давом эттириш ва ҳамкорликни янада изчил ривожлантириш юзасидан келишиб олинди, деб хабар беради Олий Мажлис Сенати матбуот хизмати.
