Эслатиб ўтамиз, ушбу лойиҳанинг тахминий қиймати 1,8 миллиард долларни ташкил этади. Лойиҳа доирасида «GTL» заводида ишлаб чиқариладиган 430 минг тонна нафтани қайта ишлаш натижасида, йилига, юқори ликвидли бўлган 280 минг тоннагача полиэтилен ва 100 минг тоннагача полипропилен ишлаб чиқариш кўзда тутилган.
Буюк Британиянинг «HIS Markit» компанияси томонидан ўтказилган маркетинг тадқиқотлар натижасида янги заводда полиэтилен ва полипропиленнинг юқори талабга эга маркаларини ишлаб чиқариш таклиф этилди.
Янги заводда ишлаб чиқарилиши мўлжалланган юқори зичликдаги полиэтилен ва полипропилен кенг соҳаларда ишлатилиши кўзда тутилган бўлиб, улар қувурлар, пленка ва толалар ишлаб чиқариш ҳамда экструзия жараёнларига мўлжалланган. Бу турдаги маҳсулотлар ҳозирги кунда нафақат Ўзбекистонда, балки яқин хорижда ҳам ишлаб чиқарилмайди.
Лойиҳани молиялаштириш мақсадида Россиянинг «Газпромбанк» АЖдан 300 миллион доллар кредит жалб қилинди. Бундан ташқари лойиҳавий молиялаштириш тамойилига асосланган кредит маблағларини жалб этиш мақсадида Хитой давлат ривожланиш банки, Синошур экспорт-кредит агентлиги ва Европа молиявий институтлар билан ишлар олиб борилмоқда.
Шу кунга қадар лойиҳа доирасида юқори малакага эга бўлган Буюк Британиянинг «Worley Parsons» компанияси томонидан кенгайтирилган базавий лойиҳалаштириш (FEED) ишлаб чиқилган.
Бундан ташқари лойиҳа доирасида дунёда таниқли бўлган ишлаб чиқариш лицензиарлари танланган бўлиб, улар АҚШнинг «Сhevron Pilliphs Chemical» (полиетилен ишлаб чиқариш) ва «McDermott» (полипропилен ишлаб чиқариш ва нафта крекинги қурилмаси) компанияларидир.
Лойиҳани амалга ошириш учун Сингапурнинг «ENTER Engineering» компанияси билан батафсил лойиҳалаштириш, ускуналарни сотиб-олиш ва қуриш учун шартнома имзоланди.
Бугунги кунга қадар ЕРС – пудратчи томонидан лойиҳага жами 528 юқори малакали мутахассис жалб этилган. Лойиҳа доирасида батафсил лойиҳалаштириш ишлари 46 фоизга якунланди.
Батафсил лойиҳалаштириш ишларига Жанубий Кореянинг «Hyundai Engineering» ва «DJS ENGINEERING AND CONSTRUCTION» компаниялари жалб этилган бўлиб, уларнинг юқори малакали ва катта тажрибага эга бўлган муҳандислари «Ўзбекнефтгаз» АЖ ва Шўртан газ-кимё мажмуасининг етакчи мутахассислари билан биргаликда лойиҳалаштириш ишларини амалга оширяпти.
Лойиҳани амалга ошириш жараёнларини мувофиқлаштириш учун буюртмачига ёрдам бериш мақсадида «Bureau Veritas Certification service» компанияси ҳам жалб этилган.
Ҳозирги кунга келиб асосий ускуналарни етказиб берувчиларни олдиндан саралаш жараёни давом этяпти. Умумий 381 тадан 110 та асосий технологик ускунани ишлаб чиқаришга буюртма берилди.
Жумладан Германияда совитиш ва маҳсулотни қадоқлаш ва изобутан-азот қайта ишлаш ускуналари, полимеризация реактор агитатори, полимеризация реактори, Хитой Халқ Республикасида полиэтилен кукуни ва маҳсулотни трансфер қилиш ускунаси ҳамда сфера резервуари, Жанубий Кореяда полипропилен кукуни ва маҳсулотни трансфер қилиш ускунаси ва ретцикл изобутан насоси, Францияда полимер кукуни ва қўшимчалар етказиш ускуналари, Италияда совитиш ускунаси ва халқасимон реактор, АҚШда реактор циркуляция насоси, Канадада «Blow Film» экструдер қурилма пакети, Туркияда «Захира резервуари-1», «Захира резервуари-2», Голландияда «Резервуар» ва «Крекинг печи (SRT Furnaces)» каби ускуналар буюртма асосида тайёрланяпти.
Мазкур лойиҳани амалга ошириш натижасида Ўзбекистонда полиэтилен ҳамда полипропилен ишлаб чиқариш ҳажмлари оширилиб, юртимизда сифатли ва экспорт товарлар ишлаб чиқариш учун замин яратилади, деб хабар беради «Ўзбекнефтгаз» АЖ Матбуот хизмати.
