Энди Сингапурга келувчи барча кишилар, жумладан, хорижликлар 2 ҳафталик карантинда қолиш вақтида махсус электрон билакузуклар тақишга мажбур бўлади. Бу ҳақда Сингапур таълим ва инсон ресурслари вазирликлари ҳамда иммиграция ва назорат бошқармасининг қўшма баёнотида айтиб ўтилган.
Ушбу талаб 10 август соат 23:59дан кучга кириб, мамлакат фуқаролари ва хорижлик ишчилар ҳамда уларнинг оилалари аъзоларига тааллуқли бўлади. 12 ёшгача бўлган болалар мазкур талабга амал қилмасликлари мумкин.
Ушбу мониторинг тизимлари мамлакатга кириш вақтида берилиб, карантиндаги киши ўзи яшайдиган жойни тарк этмоқчи бўлса, қурилма бу ҳақида расмий идораларга маълум қилади. Қоидабузарлар 10 минг Сингапур доллари (7,2 минг доллар) миқдоридаги жарима ва/ёки 6 ойгача озодликдан маҳрум қилиниш билан жазоланиши мумкин, хорижликлар эса депортация қилинади.
Шу билан бирга, 15 июндан ҳукумат Австралия, Бруней, Хитой, Янги Зеландия, Жанубий Корея ва Япониядан келганларга махсус марказларда 2 ҳафталик изоляциядан ўтиш талабини бекор қилган.
