Тожикистоннинг Хўжанд шаҳрида ОФК кубоги доирасида бир ўйиндан иборат плей-офф баҳси бўлиб ўтди. Унда Хўжанднинг “Хўжанд” ва Жиззахнинг “Сўғдиёна” жамоалари учрашди. Ўйиннинг 13 ва 21-дақиқаларида Жасур Ҳасанов мезбонлар дарвозасини аниқ нишонга олди. 29-дақиқада Шохрух Норхонов ҳисобни йириклаштирди – 0:3.
Иккинчи бўлим якунида эса, Жавоҳир Қаҳрамонов тўртинчи гол муаллифи бўлди. Шу тариқа, “Сўғдиёна” кейинги босқичга чиқди.
Жиззахликлар навбатдаги босқич – ҳудудлараро плей-офф ярим финалида Ҳонконгнинг “Истерн” клуби билан баҳслашади. Бу ўйин 6 сентябрь куни Жиззахда ўтказилади.
Агар “Сўғдиёна” “Истерн”ни енгса, ярим финал – ҳудудлараро плей-офф финалида Малайзиянинг “Куала Лумпур” ва Индонезиянинг “Макассар” жамолари ўртасидаги ўйин ғолиби билан учрашади. Бу ўйин ҳам Жиззахда, 5 октябрь куни ўтказилиши мумкин.
Жиззахликлар бу тўсиқдан ҳам ўта олса, ОФК Кубоги финалига чиқади ва Ғарбий ҳудуд ғолибига рўбарў келади. Ғарбий ҳудудда “Ал-Арабий” (Кувайт), “Ас-Сиб” (Уммон), “Ист Риффа” (Баҳрайн) ва “Ар-Риффа” (Баҳрайн) финалга чиқиш учун ўзаро кураш олиб бормоқда.
Ҳозирча финал ўйиннинг санаси ва қаерда ўтказилиши маълум эмас.
