Пандемия сабаб чет давлатга бориб ишлаш ортга сурилди. Уйда бекор ўтириш ҳам ярамади. Шу боис туман 4-сектор ташаббуси билан оилавий бизнесга қўл урдик. Нон печи сотиб олиб, уйда нон пиширишни йўлга қўйдик. Энди бизнинг оилада хорижда ишлаш деган гапга ўрин қолмади. Кунлик чиқимларимизни қоплаш билан бирга оз-моз ортяпти ҳам. Қўшнилар, маҳалладошлар, қўйингки, бутун қишлоқ аҳолисига ёпган нонларимиз манзур бўлмоқда. Биз бундан жуда хурсандмиз.
Солиқ идоралари ходимлари келиб, бизга ўзини ўзи банд қилиш борасида тушунча беришганди. Таклиф бизга, тўғриси, хўб маъқул келди. Ўша куннинг ўзида турмуш ўртоғим ҳам, ўзим ҳам ўзини ўзи банд қиладиганлар рўйхатига киритилдик, яъни йиллик тўловларни тўлаб бориш эвазига меҳнат стажига эга бўлмоқдамиз. Бу эса келажакда пенсия таъминотига биз ҳам эга бўламиз, дегани. Энди оиламиз бир жойда жам бўлиб, меҳр-оқибатимизни ошириб меҳнат қиляпмиз. Бунинг ҳам гашти ўзгача. Давлатимиз томонидан кўрсатилган мана шундай эътибордан мамнунмиз. Келажакда бошқа имкониятлардан ҳам фойдаланиб, ишларимизни янада кенгайтирамиз. Шунақа, тузуккина нонвойга айландик, пиширган нонимиздан татиб кўргани, албатта, сиз ҳам мўъжаз ишхонамизга келинг!
Энди бозорда ўз маҳсулотимни эркин сота оламан
- Ҳеч қачон ўз ҳунарим орқасидан нафақага чиқишим мумкинлигини ўйламаганман, - дейди Поп марказидан анча олисда яшовчи чоркесарлик Ҳайитбуви Қурбонова. - Мана, бир неча йиллардан буён пайпоқ ва рўмол тўқиб сотамиз. Атрофимга фарзандларим ва яқинларимни ҳам жалб этганман. Қўй ва эчки юнгидан тайёрланаётган бу маҳсулотлар яхшигина меҳнатталаб эса-да, ишимиздан қониқамиз. Сабаби оиланинг асосий даромади ана шу ҳунарим ортидан келади. Туман давлат солиқ инспекцияси бошлиғи Жамшид Бўтаев аёллар билан юзма-юз суҳбатлашиб, ўзини ўзи банд қилиш орқали пенсия таъминотига эга бўлиши ҳақида гапирганларида жудаям севиниб кетдим.
Яъни қарорда белгиланганидек, рўйхатдан ўтган фуқаролар энди ўз маҳсулотларини бозорда бемалол сотишлари, фаолиятларини эркин олиб боришлари мумкин экан. Асосийси, биз даромад солиғидан озод бўларканмиз. Шу куниёқ маҳалламизга бириктирилган солиқ ходимини чақириб, қизим ва ўзимни рўйхатдан ўтказиб қўйдим. Жараёнлар эса қўл телефонидаги мобил илова орқали амалга оширилгани сабабли ортиқча вақт ҳам кетмади. Ҳа, энди биз келажакда пенсия таъминотига эгамиз.
Орифжон ЖЎРАЕВ,
«Янги Ўзбекистон» мухбири.
