Аниқланишича, жорий йилнинг 2 февраль куни Музработ тумани “Меҳнатобод” маҳалласида яшовчи, Ўзбекистон Республикаси ЖКнинг 168-моддаси билан айбланувчи тариқасида ўтаётган Р.Р. исмли аёлнинг уйига 6 нафар эркак келиб, қарз бўлган пулларини талаб қилиб, манзилда жанжал чиқаришган ҳамда жамоат тартиби ва фуқароларнинг тинчлигини бузишган.
Чақирув асосида воқеа жойига етиб борган профилактика инспекторлари томонидан жанжал қилаётган фуқаролар билан тушунтириш ишлари олиб борилиб, ҳолатни расмийлаштириш мақсадида туман ИИБга олиб кетиш жараёнида, улардан бири 1972 й.т. Ч.Х. ходимларга кескин қаршилик кўрсатиб, профилактика инспектори капитан Р. Чориевнинг юз қисмига боши билан зарба берган. Жавобгарликдан қутулиш мақсадида, Ч.Х. ўзини ҳушини йўқотгандай кўрсатиб симуляция қилган.
Касалхонага олиб борилиб, Ч.Х.нинг соғлиғини текшириш жараёнида, унинг фарзанди 2008 йилда туғилган М.Х. етиб келиб, профилактика инспектори майор Э.Азамовга тўсатдан хужум қилган вақтида, ходим томонидан жисмоний куч ишлатиб, зарарсизлантирилган.
Ҳозирда ҳолат юзасидан Музработ туман прокуратураси томонидан Ўзбекистон Республикаси ЖКнинг 219-моддаси 2-қисми билан жиноят иши қўзғатилиб, фуқаро Ч.Х.га нисбатан қамоқ тарзидаги эҳтиёт чораси қўлланилган, унинг вояга етмаган ўғли М.Х.га нисбатан қонунчиликка мувофиқ тилхат эҳтиёт чораси белгиланган.
