Бу ҳақда ИИВ Матбуот хизмати хабар берди.
Жиноий гуруҳ етакчиси 1990 йилда туғилган бўлиб, илгари ҳам ЖКнинг 277-моддасининг 2-қисми билан судланган. У 2001-2002 ва 1986 йилда туғилган 3 нафар шахсни ёллаб, қабиҳ ишларини бажариб юрган. Олиб борилган тезкор суриштирув ишлари давомида ушбу гуруҳнинг ноқонуний хатти-ҳаракатидан 10 дан ортиқ фуқаро жабрлангани аниқланди.
Масалан, уюшган жиноий гуруҳ ер масаласи бўйича даҳли бўлмаган низога аралашган. 1987 йилда туғилган фуқародан 20 миллион сўм талаб қилиб, оила аъзоларига тазйиқ ўтказиш билан қўрқитган.
Шу каби уларга боғлиқ бўлмаган, бошқаларнинг қарз олди-бердисига аралашиб, 2006 йилда туғилган фуқародан 10 млн сўм талаб қилган. Пичоқ билан таҳдид қилиб, ахлоққа зид ҳаракатларга мажбурлаб, видеотасвирга олиб, тарқатиб юбориш билан қўрқитиб келган. Жабрланувчи эса ушбу пулларни ишлаб топиш мақсадида Россияга кетгани маълум бўлди. Ёшлардан эса сабабсиз зўравонлик билан пул талаб қилган.
Шунингдек, 2008 йилда туғилган фуқарони машинасига ўтирғизиб, кимсасиз ерга олиб бориб, бел қисмига ва бўйнига пичоқ тираб нотаниш одамларни жисмоний қийноққа солган видеоларни кўрсатиш ва ўлдириш билан таҳдид қилган ҳолда, бўлиб-бўлиб умумий 39 минг 800 АҚШ доллари миқдоридаги пулини олишгани аниқланди.
Улар телефон савдоси, ойлик иш ҳақи, автомашина олди-сотдиси, ишга жойлаш, ишлаган пулни ундириб бериш каби барча масалаларда фуқароларга таҳдид, қўрқитиш, товламачилик ва зўравонлик орқали миллиардлаб пулларни талаб қилиб, уларни жим юришга мажбур қилган.
Мазкур ҳолатлар юзасидан уюшган жиноий гуруҳ аъзоларига нисбатан ЖКнинг 165-137-138 ва 141-3-моддалари билан жиноят иши қўзғатилиб, тергов ҳаракатлари давом эттирилмоқда.
