Телеграмм орқали аёлни алдаб пулларини қўлга киритган шахсга жиноят иши қўзғатилди

Хавфсизлик 13 авг 2021, 09:57 768

Шу йилнинг 5 август куни Т.Г. исмли аёл Фарғона шаҳар ИИБга ариза билан мурожаат қилди. Унинг ёзишича, телеграм ижтимоий тармоқдаги тегишли канал аъзоси бўлган номаълум шахс 2021 йилнинг апрель ойи бошларида Т.Г.нинг пулларини кўпайтириб беришни айтиб, 600 АҚШ долларини алдов йўли билан қўлга киритган.

Мазкур ҳолат юзасидан Фарғона шаҳар ИИО ФМБ ҳузуридаги тергов бўлими томонидан Жиноят кодексининг 168-моддаси 1-қисми (фирибгарлик) билан жиноят иши қўзғатилган, дея хабар беради Фарғона вилояти ИИБ Ахборот хизмати.

Олиб борилган тезкор қидирув ҳаракатлари давомида ушбу жиноятни Х.М содир этгани аниқланиб, тергов ҳаракатлари олиб борилмоқда.

Фирибгарлик қонунга асосан жиноий жавобгарликка сабаб бўлишини эсдан чиқарманг.

Юқорида кўрсатилган жиноятни содир этган шахс уч йилгача озодликдан маҳрум қилиш билан жазоланиши мумкин.