Бу ҳақда Буюк Британиянинг йирик илмий-тадқиқот маркази — “Биобанк” томонидан олиб борилган изланишларнинг натижаси ҳақида Daily Mail хабар қилди.
Тадқиқотлар шуни кўрсатадики, телеэкран олдида кунига 2 соатдан кўп ўтириш юрак қон-томир касаллиги ва саратон хавфини оширар экан. Бу ҳолат айнан юрак хуружи ёки инсультдан вафот этишга олиб келиши мумкин.
Бунга асосий сабаблардан бири, аксарият инсонларнинг телевизор кўриб, тамадди қилишларидир. Бундан ташқари, кўпчилик диванга ёнбошлаганча кўп вақтини экранга тикилганча ўтказади ва жисмоний машқларни умуман бажармайди. Яна бир сабаблардан бири, экрандан чиқаётган кўк рангнинг кечқурунги уйқуга салбий таъсир қилишидир.
Тадқиқот давомида 37 ёшдан 73 ёшгача бўлган 500 минг атрофида инсонларнинг телевизор кўришга қанча вақт сарфлаши ўрганилган.
Таҳлиллар шуни кўрсатдики, улар орасида зангори экран қаршисида кўпроқ ўтирадиганларда бошқаларга қараганда юқорида келтирилган касалликларга мойиллик юқорилиги кузатилган. Тадқиқот давомида шу касалликлар аломатлари тезроқ ривожланганлиги ўз исботини топган.
Марказ экспертлари тв кўришдан кўра, бир соат тоза ҳавода сайр қилиш инсон организми учун жуда фойдали, ҳатто ўлим хавфини 10 фоизга камайтириши мумкинлигини таъкидламоқда. Уларнинг айтишича, кунига 6 соатдан кам ухлаш ҳам телевизор олдида соатлаб ўтиришчалик хавфли эмас.
