Фармацевтика маҳсулотлари хавфсизлиги маркази “Dr. Reddyʼs Laboratories Ltd” компаниясининг Ўзбекистон Республикасидаги ваколатхонасидан келиб тушган расмий маълумотга таяниб, ушбу ҳолат юзасидан жамоатчиликка изоҳ берди.
Маълум қилинишича, ишлаб чиқарувчи томонидан ўтказилган сифат назорати ҳамда барқарорлик синовлари натижасида “Telsartan H 80 мг/12,5 мг” дори воситасининг C2501976 сериясида фаол модда — гидрохлоротиазид миқдори белгиланган меъёрлардан оғишгани аниқланган. Бу эса препаратнинг сифат кўрсаткичлари бўйича номутаносиблик мавжудлигини англатади.
Шу билан бирга, Ўзбекистон ҳудудида муомалага чиқарилган C2501977 сериясида фаол модда миқдори бўйича ҳеч қандай камчилик қайд этилмаган. Бироқ мазкур серия номутаносиблик аниқланган партия билан бир хил ишлаб чиқариш лотига мансуб фаол модда асосида тайёрлангани сабабли, эҳтимолий хавфларни олдини олиш мақсадида у ҳам профилактик чора сифатида бозордан қайтариб олинмоқда.
Мутахассислар таъкидлашича, бу қарор фуқаролар саломатлигини ҳимоя қилиш ва дори воситалари муомаласи хавфсизлигини таъминлашга қаратилган.
Шу муносабат билан, мазкур серияга тегишли “Telsartan H 80 мг/12,5 мг” препаратини харид қилган фуқаролардан уни қабул қилмаслик, агар уйда мавжуд бўлса ундан фойдаланмаслик, шунингдек, даволашни давом эттириш масаласида даволовчи шифокор билан маслаҳатлашган ҳолда муқобил дори воситасини танлаш сўралмоқда.
Фармацевтика маҳсулотлари хавфсизлиги маркази аҳолини дори воситаларидан фойдаланишда доим эҳтиёткор бўлишга, уларни шифокор тавсиясисиз қабул қилмасликка ҳамда бундай маълумотларни фақат расмий ва ишончли манбалар орқали текшириб олишга чақирди.
Шунингдек, дори воситалари билан боғлиқ ҳолатлар юзасидан шошма-шошарлик билан хулоса чиқармаслик ва турли норасмий манбаларда тарқатилаётган тасдиқланмаган хабарларга ишонмаслик тавсия этилди.
