Йиғилиш якунлари бўйича вилоятнинг сув-энергетика балансини тартибга солувчи қатор протоколлар имзоланди, дея хабар беради oz.inform.kz сайти.
Ўзбекистон Энергетика вазирлигининг хабар беришича, куз-қиш мавсумида уч мамлакат сув-энергетика тизимининг барқарор ишлашини таъминлаш ва бу борадаги ҳамкорлик алоқаларини янада чуқурлаштириш масалалари учрашувда муҳокама қилинди.
Учрашув сўнгида томонлар ўртасида доимий ишчи гуруҳ йиғилишларини ўтказиб туришга келишилди ва тегишли баённомалар имзоланди.
Қозоғистон ҳукумати сайтининг хабарида айтилишича, асосий ҳужжат Тўқтоғул сув омборидан сув ташланишини таъминлаш бўйича томонларнинг мажбуриятларини қайд этади. Бу эса, Қирғиз Республикасига Қозоғистон ва Ўзбекистондан электр энергияси етказиб бериш эвазига амалга оширилади. Шунингдек, Россия Федерациясидан Қирғизистонга электр энергияси транзити шартлари ҳам Қозоғистон энергетика тизими орқали келишиб олинган. Ушбу чоралар сув омборида зарур даражада сув сақлаш ва Қозоғистоннинг жанубий вилоятларини вегетация даврида сув билан таъминлашга қаратилган.
Ташриф доирасида икки томонлама музокаралар ҳам бўлиб ўтди. Ўзбекистон томони билан Қозоғистонга 2026 йил мартдан декабригача тахминан 900 млн кВт/соат ҳажмда электр энергияси етказиб бериш протоколи имзоланди. Бу ҳажм Жанубий Қозоғистон энергетика ҳудудида станциялардаги таъмир ишлари вақтида юзага келиши мумкин бўлган энергия танқислигини қоплаш учун мўлжалланган.
— “Сув-энергетика соҳасида ишончли ишлаш максимал аниқлик ва жадвалларга қатъий риоя этишни талаб қилади. Имзоланган протоколлар – аниқ рақамлар, муддатлар ва нархлар кўрсатилган ишчи ҳужжатлардир”, – дея учрашув якунини изоҳлади вазир Ерлан Аккенженов. – “Биз етказиб беришнинг техник шартларини қайд этдик ва мавжуд масалаларни ҳал қилдик. Қозоғистон ўз мажбуриятларини бажаради ва ҳамкорлардан ҳам шундай ёндашувни кутади. Бу бутун минтақанинг энергетика тизими ва сув таъминоти барқарорлигининг асосидир”.
Тузилган келишувлар яқинлашиб келаётган куз-қиш мавсумида хавфларни камайтириш имконини беради. Шунингдек, улар келгуси вегетация даври учун тахминий сув захираларини тўплаш учун қулай шарт-шароитлар яратади, дейилади хабарда.
