Учрашувда Тошкент шаҳар ҳокими Жаҳонгир Ортиқхўжаев ва Россия металлургия саноатининг энг йирик компаниялари раҳбарлари иштирок этди. Россия тарафдан «МетПром» компаниялар гуруҳининг раҳбари Андрей Дейнеко ва РЭМ (Россия экспорт маркази) гуруҳига кирувчи «ЭКСАР» АЖнинг бош директори Никита Гусаковлар вакиллик қилди.
Учрашувда Ўзбекистон ва Россия ўртасидаги дўстлик ва ҳамкорлик алоқалари тобора мустаҳкамланиб, барча соҳаларда ривожланиб бораётганлиги таъкидланди. Янги қўшма лойиҳалар, маданий дастурлар амалга оширилаётгани айтиб ўтилди.
Ўзаро мулоқот давомида Жаҳонгир Ортиқхўжаев бевосита Тошкент билан ҳамкорлик масаласига тўхталар экан, икки томон ҳам биргаликдаги ишлаб чиқаришни ишга туширишдан манфаатдорлигини таъкидлади. Шунингдек, у ушбу ишлаб чиқариш учун Янгиҳаёт тумани энг истиқболли эканлигини айтиб ўтди.
Ўз навбатида, Андрей Дейнеко ҳозирги кунда 200 000 тонна қатламли металлопрокатни истеъмол қилувчи Ўзбекистон бозори эспертлар томонидан ўрганилганини ҳамда эҳтиёжлар таҳлили асосида улар ўз таклифларини қайта шакллантирганларини маълум қилди. Қурилиш ва маиший техникани ишлаб чиқаришда пишитилган қора тунукага талаб юқорилигини, лекин улар зарур оқ тунукани ишлаб чиқаришни таъминлашга тайёр эканликларини айтиб ўтди. Бунда совуқ ишлов берилган пўлат турли сортаментларда – қатламларда ва рулонларда бўлиши мумкин.
Бундан кейин тарафлар ушбу муҳим инвестицион технологик лойиҳани амалга ошириш йўлидаги аниқ босқичларни муҳокама қилдилар.
