Айни пайтда ушбу майдонларга чигит экиш ишлари жадал олиб борилмоқда. Бунинг учун 184 та чигит экиш отряди ташкил этилиб, уларга 1 минг 704 та техника бириктирилгани ишга унум бағишлаяпти.
Вилоят ҳокимининг Қишлоқ ва сув хўжалиги масалалари бўйича биринчи ўринбосари Холмирза Ниёзовнинг айтишича, мўл ҳосил етиштиришнинг асосий омилларидан бири тўғри нав танлаб, чигитни ўз вақтида экишдир. Шунинг учун бу йил асосий майдонларда ғўзанинг йиллар давомида синовдан ўтган “Султон”, “Порлоқ”, “С-6524”, “Наманган-77” навлари жойлаштирилмоқда.
Булардан ташқари, жорий мавсумда Бўка, Пискент, Оққўрғон, Юқори Чирчиқ, Ўрта Чирчиқ, Қуйи Чирчиқ ва Чиноз туманларида илк бор эртапишар, ҳосилдор ва тола чиқиши юқори бўлган “С-8290” ғўза нави тажриба тариқасида экилмоқда.
