Маълум қилинишича, пойтахт аэропортида «яшил» йўлак орқали спорт озуқаси ниқоби остида 560 граммдан ортиқ “альфа-PVP” синтетик гиёҳвандлик моддасини олиб киришга уринган хорижлик шахс божхоначилар томонидан қўлга олинган.
Тезкор тадбирлар шу билан чекланиб қолмади. Божхона органлари Давлат хавфсизлик хизмати ва Ички ишлар вазирлиги ходимлари билан ҳамкорликда жиноят занжирининг бошқа иштирокчиларини ҳам аниқлади.
Хусусан, Тошкент шаҳрининг Бектемир туманида мазкур юкни қабул қилиб олиши керак бўлган шахс ушланиб, унинг уйида ташкил этилган яширин лаборатория фош этилди. У ердан тарқатишга тайёрланган ўрамлар, электрон тарозилар ва zip-пакетлар топилган.
Шунингдек, Сурхондарё вилоятининг Сариосиё туманида 14 кг 680 грамм “опий” моддасини 180 минг АҚШ долларига сотмоқчи бўлган шахс жиноят устида қўлга олинган.
Қайд этилишича, жорий йил бошидан буён божхона органлари томонидан 383 килограммдан ортиқ гиёҳвандлик воситаларининг ноқонуний айланмасига чек қўйилган.
Ҳозирда мазкур ҳолатлар юзасидан тергов ҳаракатлари давом этмоқда.
