Тошкент шаҳрида Давлат хавфсизлик хизмати, Ички ишлар бош бошқармаси ва Божхона идоралари ҳамкорлигида ўтказилган тезкор тадбирда Тожикистондан гиёҳвандлик воситалари олиб кириб сотиш билан шуғулланган оила аъзолари қўлга олинди.
Маълумотларга кўра, “Оҳангарон – Пискент” йўналишида ҳаракатланаётган “EQUINOX” автоулови тўхтатилиб, унда бўлган 1976 йилда туғилган аёл ва унинг 1999 йилда туғилган ўғли Тожикистондан яширинча олиб кирилган гиёҳвандлик моддасини олиб кетиш учун йўлга чиққанлиги аниқланган.
Уларнинг телефонларини текшириш жараёнида “Телеграм” орқали наркотик моддаларнинг жойлашуви ва фотосуратлари юборилгани маълум бўлиб, тезкор тадбир давом эттирилди. Натижада Пискент туманида йўл четига яшириб кетилган 4 кг 985 гр “гашиш” ашёвий далил сифатида олинди.
Шунингдек, уларнинг Олмазор туманидаги хонадондан 1 кг 124 гр “опий” ва 1 кг 976 гр “гашиш” топилди.
Аёлнинг 1996 йилда туғилган, муқаддам судланган яна бир ўғли ҳам процессуал тартибда ушланган.
Ҳозирда ушлангаларга нисбатан Жиноят кодексининг тегишли моддалари билан жиноят иши қўзғатилиб, улар “қамоқ” эҳтиёт чорасига олинган. Тергов ҳаракатлари давом этмоқда.
