Ўзбекистон Республикаси Қуролли Кучлари ташкил этилганининг 34 йиллиги ҳамда Ватан ҳимоячилари куни муносабати билан 12 январь куни пойтахтимизда Қуролли Кучлар таркибига кирувчи вазирлик ва идоралар ҳарбий бўлинмаларининг тантанали пиёда юриш маросими ўтказилади.
Ҳарбий бўлинмаларнинг тантанали пиёда юриши Ўзбекистон Республикаси Ҳарбий хавфсизлик ва мудофаа университетидан (мўлжал: «Пушкин» метро бекати) соат 11:00 да бошланиб, 13:00 га қадар давом этади.
Маросим давомида ҳарбий бўлинмалар «Паркент» ва «Мустақиллик» кўчалари бўйлаб ҳаракатланиб, Амир Темур хиёбонида жойлашган тўхташ нуқтасида фахрий қоровул жамоаси ҳамда қўл жанги усталарининг кўргазмали чиқишлари, бўлинмаларнинг жанговар чақириқлари ва ҳарбий оркестрнинг дефиле намойишлари тақдим этилади. Шундан сўнг ҳарбий бўлинмалар «Мустақиллик» ва «Темирйўл» кўчалари орқали бошланғич манзилга қайтиб боради.
Шу муносабат билан 12 январь куни соат 11:00 дан 13:00 гача бўлган вақт оралиғида юқорида кўрсатилган кўчаларда автотранспорт воситалари ҳаракати вақтинчалик чекланади. 
Юзага келиши мумкин бўлган ноқулайликлар учун узр сўралди ва фуқаролар мазкур тантанали тадбирларда фаол иштирок этишга чорланди.
