Маълум қилинишича, сўнгги йилларда Тошкент метрополитенидан фойдаланувчилар сони сезиларли даражада ошган. Шу муносабат билан ҳаракатланиш имконияти чекланган шахслар ва кекса ёшдаги йўловчилар учун қулай шароит яратиш мақсадида метро бекатларига замонавий электрон кўтаргич пандуслари ўрнатилмоқда.

Лойиҳа Ўзбекистон Республикаси Вазирлар Маҳкамасининг тегишли қарори асосида амалга оширилмоқда. Буюртмачи сифатида Тошкент шаҳар ҳокимлигининг “Ягона буюртмачи хизмати” инжиниринг компанияси иштирок этмоқда. Қурилиш-монтаж ишларини эса “Texnopark” МЧЖ бажармоқда.

Қайд этилишича, айни пайтда электрон пандусларни ўрнатиш, созлаш ва синовдан ўтказиш ишлари давом этмоқда. Шу сабабли қурилмалар ҳали тўлиқ ишга туширилмаган.

Метрополитен маълумотига кўра, электрон пандусларни тезроқ фойдаланишга топшириш юзасидан масъул ташкилотларга бир неча бор расмий мурожаатлар юборилган. Шунингдек, яқинда Тошкент шаҳар ҳокимлигида ўтказилган йиғилишда ҳам қурилиш-монтаж ва созлаш ишларини тезкор якунлаш бўйича тегишли топшириқлар берилган.

Таъкидланишича, мазкур электрон пандуслар ҳозирча “Тошкент метрополитени” ДУК балансига қабул қилинмаган. Улар барча ишлар якунланиб, техник талаблар ва қабул қилиш тартиблари тўлиқ бажарилганидан кейингина корхона тасарруфига ўтказилади.

Шунингдек, ҳар бир электрон пандус ёнига ундан тўғри ва хавфсиз фойдаланиш бўйича йўриқнома ва тушунтириш материаллари жойлаштирилмоқда.