ДХХ маълум қилишича, Call-марказга келиб тушган мурожаат асосида хизматнинг Тошкент шаҳар бошқармаси ҳамда Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган.
Унда Кадастр агентлигининг Яшнобод туман бўлими бош инспектори учинчи шахс орқали 2 минг АҚШ долларини олаётган вақтида қўлга олинган.
Аниқланишича, у хизмат мавқеидан фойдаланиб, маҳаллий фуқаро томонидан ноқонуний ўрнатилган енгил конструкцияли қурилмаларни буздирмаслик ва унга нисбатан жарима қўлламаслик эвазига мазкур маблағни талаб қилган.
Яна бир ҳолат Андижон шаҳрида қайд этилган. 1984 йилда туғилган фуқаро харидорга Андижон туманининг Ҳаққан саноат ҳудудида жойлашган, давлат захирасига тегишли 40 сотих ер майдонини гўёки «E-auksion» орқали ютиб олганини айтган.
У ер майдонини кадастр тизимидаги танишлари орқали харидор номига расмийлаштириб беришни ваъда қилиб, бунинг эвазига 160 минг АҚШ доллари талаб қилган.
Давлат хавфсизлик хизмати, Ички ишлар органлари ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда у олдиндан келишилган 80 минг АҚШ долларини олаётган вақтида ушланган.
Ҳар икки ҳолат юзасидан қонунчиликда белгиланган тартибда терговга қадар текширув ва процессуал ҳаракатлар олиб борилмоқда.
