Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг маълум қилишича, жорий йилнинг 11 март куни 3 нафар йигит ҳайдовчилик ҳуқуқига эга бўлмаган ҳолда бошқа шахсга тегишли, давлат рақам белгиси ечиб олинган ва милтилловчи чироқлар ўрнатилган «Gentra» автомобилини бошқарган.

Шунингдек, улар ҳаракат давомида йўлнинг қарама-қарши йўналишига чиқиб, ҳаракат хавфсизлигига жиддий хавф туғдирган.

Қоидабузарлар аниқланиб, уларнинг 2 нафарига 5 суткадан маъмурий қамоқ жазоси тайинланди. 1 нафарига эса БҲМнинг 3 баравари (1 млн 236 минг сўм) миқдорида жарима тайинланди.

Шу билан бирга, транспорт воситасини бошқариш учун уларга берган шахс ҳам жавобгарликка тортилиб, БҲМнинг 5 баравари (2 млн 60 минг сўм) миқдорида жаримага тортилди.

Ҳуқуқни муҳофаза қилувчи органлар йўл ҳаракати қоидаларига қатъий риоя қилиш зарурлигини яна бир бор эслатмоқда.