25 ноябрь куни АҚШ Президенти Дональд Трамп махсус элчи Стивен Уиткоффга “тинчлик режаси” бўйича якуний келишувга эришиш учун Москвада Кремль раҳбари Владимир Путин билан учрашишни буюрганини эълон қилди. Трамп бу ҳақда ўзининг Truth Social ижтимоий тармоғидаги аккаунтида маълум қилди.
Трампнинг сўзларига кўра, дастлабки 28 банддан иборат “тинчлик режаси” “иккала томоннинг қўшимча таклифларини ҳисобга олган ҳолда такомиллаштирилди ва энди келишмовчиликлар мавжуд бўлган бир нечта бандлар қолди”.
“Ушбу тинчлик режаси бўйича якуний келишувга эришиш учун мен махсус элчим Стив Уиткоффга Москвада Путин билан учрашишни буюрдим ва армия котиби Ден Дрисколл Украина томони билан учрашади”, деб таъкидлади АҚШ Президенти.
Унинг қўшимча қилишича, ушбу музокаралардан сўнг, Уиткофф ва Дрисколл Оқ уйнинг юқори лавозимли амалдорларига натижалар ҳақида маълумот беришади.
Ўтган ҳафта Украинадаги урушни ҳал қилиш бўйича АҚШнинг тинчлик режаси эълон қилинди. Бироқ, АҚШ, Украина ва Европа делегациялари ўртасидаги музокаралардан сўнг, ҳужжат 19 бандгача қисқартирилди, деб хабар берди korrespondent.net.
