Вазирлик баёнотига кўра, уч кун давом этадиган мазкур конгресс маданий меросни асраш, умумий алифбо масалалари, муаллифлик ҳуқуқлари ҳамда тармоқлараро ҳамкорлик каби кенг йўналишларда узоқ муддатли ва амалий натижаларга эришишни кўзда тутади. Конгресс “Келажак учун — биргаликда” шиори остида бутун туркий дунёдан ноширлар, ёзувчилар, таржимонлар ва академикларни жамлайди.
Илк бор кенг кўламда ўтказилаётган ушбу конгресс туркий дунё нашриётчилик соҳасидаги умумий қарашларни мустаҳкамлашга қаратилган. Унда ҳамжамиятлар ўртасидаги маданий ва савдо алоқаларини ривожлантириш, ҳамкорлик имкониятларини кенгайтириш, шунингдек, нашриётчилик амалиётида давлатлараро уйғунлик ва стандартлаштиришни таъминлаш асосий мақсад этиб белгиланган. Шу билан бирга, соҳанинг ривожига ҳисса қўшадиган муштарак сиёсат, чора-тадбир ва ташаббусларни ҳаётга татбиқ этиш ҳам конгресснинг устувор йўналишларидан биридир.
Конгрессда Туркия билан бир қаторда Ўзбекистон, Озарбайжон, Қозоғистон, Қирғизистон, Венгрия, Молдова, Эрон, Ироқ, Германия ҳамда Шимолий Кипр Турк Республикасидан жами 140 нафар соҳа вакили иштирок этади.
Соҳавий тузилма, нашриётчилик ҳуқуқи, интеллектуал мулк ва муаллифлик ҳуқуқлари алмашинуви, контент яратиш, муштарак алифбо ва тил масалалари, нашриёт стандартлари, тўплам, таржима ва уни қўллаб-қувватлаш йўналишлари 6 та алоҳида комиссия доирасида батафсил муҳокама қилинади.
Конгресс якунида эълон қилинадиган натижавий баёнот орқали барқарор ва самарали ҳамкорликларни йўлга қўйиш, узоқ муддатли қўшма лойиҳаларни амалга оширишга қаратилган аниқ ва амалий қадамлар белгилаб олинади.
