Туркия июнь ойининг биринчи ярмида Швециянинг НАТОга аъзолик аризасини ратификация қилиш масаласига қайтишни режалаштирмоқда. Бу ҳақда 5 апрель, чоршанба куни Туркия Президенти маслаҳатчиси Иброҳим Калин Анадолу агентлигига берган интервюсида маълум қилди.
Унинг таъкидлашича, Швеция ҳали бир қатор шартларни бажармаган, шу сабабли Туркия мазкур мамлакатнинг Шимолий Атлантика иттифоқига киришига яшил чироқ ёқа олмайди.
“Парламентимиз Финляндиянинг НАТОга аъзолигини тасдиқлаганидан кейин Швеция билан кейинги учрашувимизни июнь ойининг биринчи ёки иккинчи ҳафтасида ўтказишга келишиб олдик”, дея қўшимча қилди Калин.
У мазкур муддатни 1 июндан Швецияда янги аксилтеррор қонуни кучга кириши билан изоҳлади, бу Анқара талабларини бажариш йўлидаги қадам бўлади.
Шимолий Атлантика иттифоқи Бош котиби Йенс Столтенберг Швециянинг НАТОга тезроқ аъзо бўлишига умид билдирди, деб хабар беради korrespondent.net.
