Анқара шаҳридаги «Hece Yayinlari» нашриётида чоп этилган тўплам шоир ва таржимон Ҳамза Ўзтуркчи томонидан тайёрланган. Тўпламдан ўттиз нафар ўзбек адибларининг ҳикоялари ҳамда иккита адабий суҳбат ўрин олган.
Эркин Аъзам, Ўткир Ҳошимов, Нурали Қобул, Назар Эшонқул, Луқмон Бўрихон, Улуғбек Ҳамдам каби устоз ижодкорлардан тортиб, Жасур Кенгбоев, Нодирбегим Иброҳимова, Жавлон Жовлиев каби ёш ижодкорларнинг ҳам ижодий ишлари ўрин олган тўплам турк ўқувчилари томонидан қизғин кутиб олиняпти, деб хабар беради «Дунё» АА.
– Бу тўплам ҳар ўн йилда бир марта йиғилиб, нашрга тайёрланади, – дейди суҳбатда таржимон Ҳамза Ўзтуркчи. — Камина ўзбек адибларининг асарларини тўпладим ва таржима қилдим. Жараён жуда қизғин кечди. Чунки ўзбек ёзувчиларининг асарлари, ҳикоялари ўз тили, миллий руҳдалиги билан ўқувчини ўзига тортади. Бундай асарлар адабий ришталарни мустаҳкамлашга хизмат қилади, албатта.
