Ҳужжатда янги “Тошкент” халқаро аэропорти лойиҳасини биргаликда амалга ошириш, жумладан, йўловчиларга хизмат кўрсатишнинг рақобатбардошлиги ва сифатини ошириш, илғор ахборот технологияларини жорий этиш, йўловчилар ташиш, жумладан, транзит оқимини кўпайтириш, янги авиакомпанияларни жалб этиш кўзда тутилган.
“Биз дунёдаги энг яхши аэропортлардан бири, шунигдек, энг йирик халқаро хаблардан бирини яратган компаниянинг янги пойтахт аэропорти лойиҳасига қизиқишини олқишлаймиз. Тошкент қулай географик жойлашувга эга эканлигини ҳисобга олсак, мамлакатимизда худди шундай концепцияларни амалга ошириш мумкин.
Бундан ташқари, "Changi" — бу илғор технологиялар, аэропорт фаолиятидаги катта тажриба, дунё томонидан тан олинган лойиҳа. Бундай ҳамкор билан ишлаш биз учун катта шараф ”, — дея изоҳ берди "Changi Airports International" бошқаруви раиси Раъно Жўраева.
Биринчи босқичда (6 ой) битим доирасида "Changi Airports International" компаниясини давлат-хусусий шериклик лойиҳасига хусусий шерик сифатида жалб этиш имконияти билан биргаликда лойиҳанинг техник-иқтисодий асосларини ишлаб чиқиш режалаштирилган. Лойиҳанинг умумий қиймати 1 миллиард АҚШ долларигача етиши кутилмоқда.
Changi аэропорти — Осиёдаги авиация марказларидан бири ва Сингапурдаги ягона халқаро аэропорт. 1981 йилда очилганидан буён аэропорт авиация саноатида эталонга айланди ва 1987 йилдан 2007 йилгача йигирма йил давомида 280дан ортиқ мукофотга сазовор бўлди. 2019 йилда Сингапурнинг "Changi" аэропортида 68,3 миллион йўловчи рўйхатдан ўтган ва бу аэропортни халқаро йўловчилар сони бўйича дунёдаги 7-ўринга олиб чиққан.
