БМТнинг Озиқ-овқат ва қишлоқ хўжалиги ташкилоти (ФАО) Қорақалпоғистоннинг Кегейли ва Қораўзак туманларида хотин-қизлар ва ёшларга тикувчилик, каштачилик ва халқ ҳунармандчилигини ўргатиш бўйича икки кунлик тренинглар ташкил этди. Тренингларда жами 90 га яқин аёллар иштирок этди ва улардан 30 нафарига ФАО томонидан совға сифатида тикув машиналари берилди.
Бу даромадни ошириш учун муҳим восита бўлиб, улар ёрдамида олинган билим ва кўникмалардан фойдаланган ҳолда янги санъат намуналари, шу жумладан, машҳур Қорақалпоқ миллий каштаси билан кийим-кечаклар тикиш мумкин. Лойиҳа БМТнинг Оролбўйи минтақаси учун Инсон хавфсизлиги бўйича кўп томонлама шериклик асосидаги траст фонди томонидан молиялаштирилади.
— Бизнинг фикримизча, аҳолининг заиф қатламлари, айниқса, аёлларни қўллаб-қувватлаш, уларнинг ижтимоий-иқтисодий шароитларини яхшилаш жуда муҳимдир, — деб қайд этди ФАОнинг Марказий Осиё бўйича субминтақавий ваколатхонаси табиий ресурслар бўйича мутахассиси ва лойиҳанинг техник координатори Иветта Зенина. — Зеро, Оролбўйи минтақасининг иқлим ўзгариши ва табиий ресурслар деградациясининг салбий таъсирига кўпроқ мойиллиги барчага маълум. Бугунги кунга қадар биз аёлларнинг муқобил даромад манбалари бўйича салоҳиятини ошириш бўйича тренинглар ўтказдик ва келажакда сув тежайдиган технологиялар, барқарор қишлоқ хўжалиги, электрон тижорат ва яшил молиялаштириш бўйича бир қатор тренинглар ўтказишни режалаштирмоқдамиз.
Машғулотлар давомида Қорақалпоқ халқининг бой маданияти, қадимий тарихи ва чуқур маъносини сақлайдиган анъанавий каштачилик ва миллий кийимларининг ўзига хос хусусиятларига алоҳида эътибор қаратилди. Қадимги Қорақалпоқ каштаси қизил рангнинг устунлиги билан ранглари бир-биридан кескин фарқ қлувчи иплардан йиғилган безакнинг кичик элементларини бирлаштирган.
ФАО томонидан ташкил этилган икки кунлик тренингларда иштирокчиларга миллий каштачиликнинг турли усуллари ўргатилди ва келгусида муваффақиятли ишлаш учун бошланғич кўникмалар берилди. Машғулотлар назарий ва амалий қисмларни ўз ичига олди. Шунинг учун ўқув дастурига маркетинг асослари бўйича дарслар киритилган бўлиб, иштирокчиларга ўз маҳсулотларини қандай қилиб муваффақиятли сотиш ва маълум бир мақсадли аудиторияга эътибор қаратиб, фойда олиш йўллари тушунтирилди.
