Сўнгги йилларда бу йўналишдаги эзгу ниятларимизга эришиш йўлида муҳим ислоҳотлар кечмоқда. Миллий ва халқаро тажрибадан келиб чиқиб, жамиятимизни тубдан ислоҳ этиш, инсон ҳуқуқлари ҳимоясини кучайтириш, ижтимоий-иқтисодий ислоҳотларни чуқурлаштириш йўлида чора-тадбирлар амалга ошириляпти.

Президентимиз Олий Мажлис ва Ўзбекистон хал­қига йўллаган Мурожаатномасида юрт равнақини юксалтиришга хизмат қилаётган ушбу саъй-ҳара­катларнинг натижаси хусусида тўхталар экан, “Биз ислоҳотларни аниқ амалий натижага айлантиришни ўргандик. Бунинг тасдиғини тобора янгича қиёфа касб этиб бораётган шаҳар ва қишлоқларимизда, замонавий корхоналар, савдо-сервис масканлари, мактаб, боғча ва шифохоналар, обод кўча ва маҳал­лалар, транспорт-логистика тизими, рақамли хиз­матлар мисолида яққол кўриш мумкин”, деди.

Дарҳақиқат, сўнгги йилларда жамият та­раққиётини янги босқичга кўтариш мақсадида белгиланган стратегик вазифалар ўз вақтида рўёб­га чиқарилиши натижасида турли соҳаларда туб ўзгаришлар рўй бермоқда. Тарихимизда биринчи марта ялпи ички маҳсулотимиз 145 миллиард дол­лардан ошди. 2025 йил иқтисодиётимизга жалб қи­линган хорижий инвестициялар ҳажми 43,1 мил­лиард долларга етди. Жами инвестицияларнинг ялпи ички маҳсулотдаги улуши 31,9 фоизни таш­кил этди. Бу эса иқтисодиётимиз келгуси йилларда ҳам юқори суръатлар билан барқарор ўсиб бориши учун замин бўлади.

Ўзбекистоннинг халқаро майдондаги обрў- эътибори ва нуфузи, халқаро рейтинглардаги ўрни тобора мустаҳкамланиб бормоқда. Хусусан, етакчи халқаро рейтинг агентликлари мамлака­тимизнинг суверен рейтингини “BB-”дан “BB” поғонасига кўтарди. Шунингдек, Жаҳон банки эълон қилиб борадиган Давлатларнинг техно­логик етуклик индексида Ўзбекистон 71 поғона юқори кўтарилиб, дунёнинг ТОП-10 та мамлака­ти қаторидан жой олди.

Бундай факт ва рақамлар юртимиздаги исло­ҳотлар самараларини нафақат халқимиз, балки дунёнинг кўплаб ривожланган давлатлари экс­пертлари ҳам эътироф этаётганининг яққол исбо­тидир. Зеро, бугун дунёдаги мураккаб вазиятга қа­рамай, юртимизда турли соҳаларда эришилаётган ютуқлар нафақат миллий ва минтақавий, балки глобал миқёсда долзарб масалалар ечимида ҳам ўрганиш ва ибрат олишга арзирли тажрибадир.

Бу жараёнда давлат сиёсатининг устувор йў­налишларидан бири сифатида давлат бошқаруви ва жамият ҳаётининг барча соҳаларини тубдан ислоҳ этиш, давлат органларининг ҳисобдорлиги ва очиқлигини кучайтириш, вакиллик органлари назоратининг самарали ва таъсирчан механизмла­рини йўлга қўйишга йўналтирилган чора-тадбир­ларнинг ҳам аҳамияти беқиёс. Янги таҳрирда қабул қилинган Конституциямиз бу борадаги ишларда муҳим ҳуқуқий асос бўлмоқда.

Хусусан, у республика даражасидаги ҳокимият­лар бўлиниши ва ўзаро тийиб туриш принципининг маҳаллий даражада ҳам мавжуд бўлиши учун ҳуқу­қий замин яратди. Жойларда ҳокимлар ва маҳаллий кенгашлар ваколати ажратилди. Бу чора-тадбирлар жамиятимизда очиқлик, ошкораликни таъминлаш, халқ ҳокимиятчилигини кучайтириш, бугунги ҳаётимиз ва эртанги тақдиримизга дахлдор ҳар бир масалани халқимиз билан бамаслаҳат ҳал этишда муҳим омил бўлмоқда.

Жойлардаги халқ вакиллари бу борада яратил­ган шароитлар ва берилган ваколатлардан қандай фойдаланмоқда? Маҳаллий кенгашларни чинакам халқ овозига айлантириш борасидаги вазифалар тўла рўёбга чиқяптими?

Халқ депутатлари маҳаллий кенгашлари раис­ларидан айримларининг шу хусусдаги фикрлари билан қизиқдик.

Бамаслаҳат қилинган ҳар бир ишнинг натижаси хайрли бўлади

Олтибой РАЖАБОВ, Халқ депутатлари Хоразм вилояти кенгаши раиси:

— Президентимиз парламент ва халқимизга йўллаган Мурожаатномасида юрт тараққиёти ва эл фаровонлигини ошириш борасида муҳим та­шаббусларни илгари сурди. Хусусан, 2026 йил “Маҳаллани ривожлантириш ва жамиятни юксалтириш йили” деб эълон қилиниб, маҳал­лалар ободлигини таъминлаш бўйича устувор ва­зифалар белгилаб берилди.

Айтиш жоизки, мамлакатимизда кечаётган ана шундай жўшқин ислоҳотлар жараёнида инсон ҳу­қуқ ва эркинликлари, қонуний манфаатларини таъ­минлаш орқали инсон қадрини юксалтиришга ало­ҳида эътибор қаратилаётгани жамиятимизда эри­шилаётган ютуқларнинг муҳим омили бўлаётир. Айниқса, халқимиз иродаси билан қабул қилинган янгиланган Конституциямиз юртимизда инсон қадри тамойили қарор топишида мустаҳкам замин бўлмоқда, ислоҳотларга ҳаётий куч бағишлаяпти.

Жумладан, Бош қонунимизда маҳаллий дав­лат ҳокимияти вакиллик органлари ва ижро этув­чи ҳокимият органлари ваколатлари, маҳаллий кенгаш раиси ва ҳоким лавозимлари бир-биридан ажратилгани ҳокимиятлар бўлинишига оид конс­титуциявий тамойил ижросини маҳаллий дара­жада таъминлашда муҳим қадам бўлди.

Маҳаллий кенгашларнинг назорат фаолияти­ни кучайтиришга қаратилган ҳуқуқий асослар яратилди. Маҳаллий ижро этувчи ҳокимият ор­ганларининг фаолияти устидан халқ депутатлари кенгашларининг назорат функцияларини кенгай­тириш мақсадида уларга қўшимча ваколатлар бе­рилди. Хусусан, прокуратура, адлия, ички ишлар, молия, солиқ, экология ва соғлиқни сақлаш ор­ганлари раҳбарларининг ҳисобдорлиги белгилаб қўйилди.

Ўтган йили бу жабҳадаги ишлар янада кенгай­ди. Сўнгги йилларда маҳаллий кенгашларнинг демократик қиёфаси тубдан янгиланди. Муҳим институционал ва концептуал ўзгаришлар юз берди. Уларнинг қонунчилик базаси мустаҳ­камланди, ваколатлари кенгайди.

Аввал депутатлар кун тартибига фақат ҳоким­нинг ҳисоботи киритилган бўлса, ҳозирги кунда маҳаллий даражадаги 60 дан ортиқ ташкилот­нинг ҳисобот ва ахборотлари депутатлар томо­нидан эшитилмоқда. Ушбу чора-тадбирлар ҳу­дудларни янада самарали бошқариш ва барқарор  ривожлантириш учун шароит яратмоқда. Зеро, фуқаролар қарорлар қабул қилишда иштирок эти­ши демократия ҳамда ижтимоий барқарорликни мустаҳкамлашда ҳам муҳим роль ўйнайди.

Халқ депутатлари вилоят, туман (шаҳар)лар кенгашлари томонидан ўтган йилда ўтказилган сессияларда ҳудудлар ижтимоий-иқтисодий ри­вожланишининг долзарб масалалари юзасидан масъул раҳбарларнинг мингдан ортиқ ҳисобот ва ахбороти эшитилди. Шунингдек, муҳокама қилиш, назорат-таҳлил тадбирлари ўтказиш, ва­колат доирасидаги ва бошқа масалалар кўриб чи­қилиб, тегишли қарорлар қабул қилинди.

Халқ депутатлари вилоят, туман (шаҳар)лар кенгашлари депутатлари томонидан ўтказилган 2400 учрашувда бир ярим мингга яқин муаммо аниқланиб, аксарияти жойида ҳал этилди. Шу­нингдек, халқ вакиллари сайловчилар билан ўт­казган учрашувлар давомида жойлардаги муам­моли масалалар бўйича депутат сўровлари юбо­рилди ва уларнинг натижалари тўғрисида тегиш­ли жавоб хатлари олинди. Ушбу масалаларнинг баъзилари сессияларда муҳокама қилинди.

Мурожаатлардан аҳолини кўпроқ йўл, сув, электр ва газ таъминотидаги камчиликлар безов­та қилаётгани маълум бўлмоқда. Қолаверса, ма­ҳалла инфратузилмасини яхшилаш, тиббий-иж­тимоий кўмакка муҳтожларга ёрдам кўрсатишни ҳам доимий назоратга олишга тўғри келади. Бун­дан ташқари, бандлик ва тадбиркорликни ривож­лантиришга оид лойиҳаларни жонлантиришда аҳоли ва тадбиркорларга доимий кўмак бериш лозим. Бу борадаги мурожаат ва сўровларнинг ижросини таъминлаш мақсадида халқ вакилла­рининг тегишли идора ва ташкилотлар, жумла­дан, маҳалла фаоллари билан доимий ҳамкорли­ги муҳим самара бермоқда.

Бу ишларни янада кучайтириш мақсадида ҳу­дудларни ривожлантиришга қаратилган дастур­лар ижросини самарали назорат қилиш ҳамда маҳаллалардаги муаммоларни ҳал этишда ўзаро ҳамкорликни йўлга қўйиш борасида вилоятдаги барча депутатлар маҳаллаларга бириктирилган. “Маҳалла еттилиги” билан биргаликда қабуллар ташкил этилиб, аҳолининг муаммоли масалалари эшитилди. Бундан ташқари, фуқаролар қабуллари, маҳаллалар фаолиятини ва дастурларга киритил­ган лойиҳаларни ўрганиш натижасида аниқланган муаммоларни “Маҳалла еттилиги” билан бирга­ликда ҳал этиш чоралари кўрилмоқда.

Фаолиятимизнинг яна бир йўналиши қонун ло­йиҳалари муҳокамаси жараёнида иштирок этиш­дир. Президентимиз Олий Мажлис Сенатининг 2024 йил 19 ноябрь куни бўлиб ўтган биринчи мажлисидаги нутқида бу хусусда тўхталиб, Сенат қонунларни муҳокама қилишда янгича механизм­ларни жорий этиши зарурлиги, айниқса, қонун ижодкорлиги жараёнига маҳаллий кенгашларни кенг жалб этиш, ҳар бир қонун бўйича уларнинг фикрини олиш амалиётини йўлга қўйиш муҳим аҳамиятга эга эканини таъкидлаган эди.

Бу фикрлар бежиз илгари сурилмади. Чунки ҳудудларнинг ўзига хос хусусият ва имкониятла­ри ҳисобга олинмаган қонунлар қуйи бўғинда са­марали ишламайди. Шу боис, қонунларда ҳуду­дий ва умумдавлат манфаатлари уйғун бўлишига эришиш учун уларни ишлаб чиқишда халқимиз билан бамаслаҳат иш тутиш айни муддаодир.

Сир эмас, авваллари маҳаллий кенгашнинг қарорларини ҳеч қаерда кўрмас эдик. “E-qaror” электрон тизими яратилиши бу борада муҳим тарихий воқеа бўлди. Эндиликда “E-qaror” электрон тизимини четлаб ўтган ҳолда маҳаллий дав­лат ҳокимияти органларининг тегишли қарорла­рини қабул қилиш (чиқариш)га йўл қўйилмасли­ги, бундай ҳужжатлар юридик кучга эга эмаслиги ҳамда у қабул қилинган пайтдан эътиборан ҳеч қандай ҳуқуқий оқибатларни келтириб чиқармас­лиги белгилаб қўйилди.

Бу очиқлик, ошкоралик, шаффофлик тамо­йилларини кучайтириш, маҳаллий давлат ҳоки­мияти органлари фаолияти устидан жамоатчилик назоратини таъминлашга замин яратмоқда. Бун­дан ташқари, вакиллик органлари фаолиятида очиқлик ва шаффофликни таъминлаш, маҳаллий кенгаш депутатлари билан фуқаролар ўртасида электрон мулоқот майдонини яратиш мақсадида “kengash.gov.uz” платформаси ишлаб чиқилиб, барча маҳаллий вакиллик органлари фаолиятига жорий этилди. Бугунги кунда маҳаллий кенгаш­ларга оид барча ахборотни ушбу платформадан олиш имконияти яратилган.

Мазкур йўналишдаги ишларни янада кучайти­ришда оммавий ахборот воситалари билан ҳам­корликнинг аҳамияти беқиёс. Шу мақсадда Халқ депутатлари вилоят, туман (шаҳар)лар кенгашлари сессиялари ОАВда кенг ёритиляпти. Бу жараённи янада такомиллаштириш, очиқлик тамойиллари­ни кучайтириш мақсадида сессия йиғилишлари­ни онлайн тарзда эфирга узатиш йўлга қўйилди. Бундан ташқари, халқ депутатлари вилоят, туман (шаҳар)лар кенгашлари фаолияти оммавий ахбо­рот воситаларида кенг ёритилмоқда.

Қонунчилигимизда кенгаш сўрови ва кенгаш текшируви институтлари жорий этилиши демократик тараққиёт йўлидаги яна бир дадил қадам бўлди. Кенгаш сўрови институти маҳаллий кен­гаш раиси ёки депутатларга аҳолини қизиқтирган масалалар бўйича турли давлат органлари, муас­сасалари ва ташкилотларига расмий сўровларни шакллантириш имконини берувчи механизмдир. Ушбу восита фуқароларнинг аниқ мурожаатлари­га жавобан керакли маълумотларни, тушунтириш­ларни олиш ёки чоралар кўришга қаратилган.

Бу институт депутатларга долзарб муаммолар­ни ҳал қилиш учун тезкор маълумот ва манбалар­ни олиш имкониятини бериш орқали маҳаллий ижро ҳокимияти органлари ва давлат идоралари ўртасида очиқ мулоқотни осонлаштириб, аҳоли манфаатларини фаол равишда ҳимоя қилиш им­кониятини бермоқда. Фуқаролар мурожаатлари асосида сўровлар амалга оширилиши имконияти, ўз ўрнида, депутатларга аҳоли фикрини яхшироқ ўрганиш ва уларни қарор қабул қилиш жараёнла­рига фаол жалб қилишга йўл очди.

Кенгаш текшируви институти ҳам маҳаллий бошқарув сифатини оширишда муҳим аҳамият касб этаётир. Бу аҳолини қийнаётган муаммо­ларни чуқурроқ ва синчковлик билан ўрганиш, таҳлил қилиш, маҳаллий ҳокимият органлари ишидаги муаммо ва камчиликларни аниқлашда ўз самарасини бермоқда.

Мазкур механизмлар маҳаллий ижро ҳоки­мияти органлари фаолиятида шаффофликни таъ­минлаб, аҳоли манфаатларини ҳимоя қилишда муҳим омил бўлмоқда.

Электрон жамоавий мурожаат йўллаш мумкин

Исмигул ХУШМУРОДОВА, Халқ депутатлари Қашқадарё вилояти кенгаши раиси:

— Ушбу мақсадга эришишда маҳаллий кенгашларнинг роли катта. Шу боис, демократик тараққиёт йўлини танлаган ҳар бир давлат маҳаллий кенгашлар фао­лиятини ривожлантириш учун кенг им­кониятлар яратади. Дунёга очиқ, ижти­моий ва иқтисодий ривожланган давлат барпо этишни мақсад қилган мамлакати­миз учун ҳам бу вазифа ислоҳотларнинг устувор йўналиши этиб белгиланган ва бу йўналишда кенг қамровли ишлар амалга ошириляпти.

Жумладан, конституциявий ислоҳот­лар доирасида вилоят ҳокимлари ва ма­ҳаллий кенгашлар раислари лавозимла­ри бир-биридан ажратилган эди. Энди бу тизим шу йил 1 январдан 208 та туман ва шаҳарда ҳам йўлга қўйилди.

Давлатимиз раҳбари Олий Мажлис ва халқимизга йўллаган Мурожаатномаси­да бу хусусда тўхталар экан, айни пайтда ушбу жиддий сиёсий ислоҳот — ҳоким­лар ва ижро идораларидан кенгашларга муносабатни мутлақо ўзгартиришни талаб қилишини алоҳида таъкидлади. Бундан буён депутат сўровлари ижроси ҳар чоракда таҳлил қилиниб, сусткаш­ликка йўл қўйилган ҳолатлар бўйича прокуратурага тақдимнома киритили­ши айтиб ўтилди. Албатта, бу халқ ва­киллари фаолиятига билдирилган юк­сак ишончдир.

Халқ вакилларининг ҳар бири буни чуқур англаган ҳолда ўз ишини янгича ёндашувлар асосида ташкил этишга ки­ришди. Президентимизнинг 2024 йил 2 февралдаги “Маҳаллий давлат ҳоки­мияти органлари фаолиятининг сама­радорлигини ошириш чора-тадбирлари тўғрисида”ги фармони бу борада муҳим дастуриламал бўлмоқда. Ҳужжатга кўра, маҳаллий ижро этувчи ҳокимият орган­ларининг фаолияти устидан халқ депу­татлари кенгашларининг назорат функ­циялари кенгайтирилиб, ўндан ортиқ қўшимча ваколат берилди. Ўзбекистон маҳаллий бошқаруви тарихида биринчи маротаба маҳаллий давлат ҳокимияти органлари фаолиятида янги модель — “Кучли кенгаш, ҳисобдор ва ташаббус­кор ҳоким” тамойили жорий этилди.

Бугун кенгашимиз жамият ва дав­лат ҳаётининг муҳим масалаларини ҳал этиш ҳамда ана шу йўналишда яратил­ган имкониятлар ҳамда халқнинг бево­сита ихтиёри асосида қарор қабул қилиш талаб этиладиган ваколатлардан фой­даланаётир. Бу борада вилоятимиздаги 17 та маҳаллий кенгаш самарали иш­лаяпти. Хусусан, депутатлар ўзи сай­ланган округдаги маҳаллаларга бирик­тирилди ҳамда тегишли ижро этувчи ҳокимият органларини жалб этган ҳолда ҳудудни ривожлантиришга қаратилган дастурлар, чора-тадбирлар, лойиҳалар тўлиқ хатловдан ўтказилди.

Бу жараёнда стратегик аҳамиятга эга ҳужжатларда белгиланган вазифалар­нинг жойлардаги ижро ҳолати ҳам дои­мий ўрганиб бориляпти. 2025 йилда бу борада вилоят ҳокими ўринбосарлари­нинг ҳисоботлари эшитилди. Шунинг­дек, Халқ депутатлари вилоят, туман, шаҳар кенгашлари томонидан сессия йиғилишлари ўтказилди.

Ҳудудларни ривожлантириш ҳамда аҳоли муаммоларини ҳал этишда маҳал­лий кенгашлар депутатларининг “маҳал­ла еттилиги” билан ўзаро ҳамкорлиги муҳим аҳамиятга эга. Олий Мажлис Се­нати кенгашининг ҳудудларни ривож­лантириш ҳамда аҳоли муаммоларини ҳал этишда маҳаллий кенгашлар депу­татлари ва сенаторларнинг “маҳалла еттилиги” билан ўзаро ҳамкорлигини янада кучайтиришга оид чора-тадбирлар тўғрисидаги қарори ижросини таъмин­лаш мақсадида тизимли ишлар қилинди. Жумладан, туман ва шаҳарлар бўйича 1400 га яқин лойиҳага маҳаллий кенгаш депутатлари бириктирилди.

Халқ вакиллари ҳар ойда ўзлари сай­ланган округларига чиқиб, лойиҳалар ижроси ҳамда жойларда мавжуд муам­моларни ўрганяпти, аниқланган камчи­лик ва муаммоларни бартараф этиш юза­сидан мутасаддиларга сўровлар юбор­моқда. Ўтган йилда депутатлар “маҳалла еттилиги” билан ҳамкорликда 1300 дан зиёд қабул ташкил этиб, аҳоли билан мулоқот уюштирди. Бу жараёнда аниқ­ланган тўрт мингдан ортиқ муаммонинг аксарияти маҳалла фаоллари ва ҳоким­ликлар иштирокида ижобий ҳал этилди. Ҳудудни ижтимоий-иқтисодий ривож­лантириш, инвестиция дастурлари лойи­ҳаларини дастлаб маҳаллий кенгашлар­да муҳокама қилиш, уларда белгиланган ҳар бир вазифанинг ўз вақтида ва сифат­ли бажарилиши устидан самарали депу­татлик назорати йўлга қўйилган.

Шаффофликни ошириш мақсади­да мансабдор шахсларнинг ҳисоботи кенгаш сессияси муҳокамасидан сўнг “E-kengash” платформасидаги тегиш­ли маҳаллий кенгашлар саҳифаларида эълон қилиб бориляпти. Бугун маҳаллий кенгаш қарорларини қабул қилиш жараё­ни очиқлигини таъминлаш мақсадида фуқароларнинг сессия ишини бевосита кузатишга йўл очилди. Эндиликда фу­қаролар маҳаллий кенгашларга электрон жамоавий мурожаат йўллаши мумкин.

Маҳаллий кенгашлар депутатлари томонидан хотин-қизларни қўллаб-қув­ватлаш тизимини кучайтириш, уларнинг ҳуқуқ ва қонуний манфаатларини ҳи­моялаш, ижтимоий-иқтисодий, сиёсий фаоллигини ошириш ва гендер тенглик­ни таъминлаш борасида тарғибот ишла­ри ташкил этилаётир. Аҳолининг кам­бағаллик даражасини камайтириш мақ­садида фуқароларни давлат ҳисобидан касб-ҳунарга ўқитиш, замонавий тех­ника ва технологиялардан фойдаланиш бўйича касбий кўникма ва малакасини ривожлантиришга эътибор қаратиляпти. Жамиятда ижтимоий-маънавий муҳит барқарорлигини таъминлаш ҳам диққат- эътиборимизда.

Вилоятимизда ташқи ва ички туризм учун кенг шароитлар яратиш орқали сайёҳлар сонини кўпайтириш, ҳудудлар­ни комплекс ривожлантириш, аҳолини арзон уй-жой билан таъминлаш, сувдан оқилона фойдаланиш маданиятини ва сув ишлатиш самарадорлигини оши­риш борасидаги тарғибот ишлари кўла­ми кенгайтирилмоқда. Шу билан бирга, иқлим ўзгаришининг салбий таъсири олдини олиш мақсадида экологик ва­зиятни барқарорлаштиришга қаратилган “Яшил макон” умуммиллий лойиҳаси доирасидаги ободонлаштириш ва кўка­ламзорлаштириш ишлари кенгашимиз назоратида.

Маҳаллий кенгаш депутатларининг оммавий ахборот воситалари ва ижти­моий тармоқларда мунтазам чиқишлари, ҳудуддаги воқеа-ҳодисаларга нисбатан муносабат билдириб бориши учун ма­ҳаллий кенгаш веб-сайти доимий ра­вишда янгиланяпти. Жамоатчилик би­лан алоқалар, очиқлик ва шаффофликни таъминлаш тамойили асосий устувор йўналиш сифатида белгилаб олинган ҳолда депутатлар ўз сайловчилари билан учрашиб, депутатлик фаолияти ҳақида ахборот бериб бориши йўлга қўйилган.

Шу кунларда юртимизда аҳоли ва қишлоқ хўжалигини рўйхатга олишга тараддуд кўриляпти. Халқ вакиллари жойлардаги штаблар фаолиятини сама­рали ташкил этиш борасидаги ишларни ўрганиб, рўйхатга олиш жараёнларини сифатли ва ўз вақтида амалга ошириш, штабнинг моддий-техник базасини ян­гилаш, ҳужжатлар билан ишлашни яна­да такомиллаштириш, ишчи гуруҳ фао­лиятини тизимли йўлга қўйиш борасида тушунтириш ишларини олиб бормоқда.

Бир сўз билан айтганда, маҳаллий бошқарувнинг мақбул шакли бўлган, халқ вакиллари иштирок этадиган, аҳо­лига хизмат қиладиган бошқарувга асос­ланган кенгашимиз давлат сиёсатини маҳаллий эҳтиёжларга мослаштирган ҳолда ҳукумат ва аҳоли ўртасида кўприк вазифасини бажармоқда.

* * *

Дарҳақиқат, маҳаллий давлат ҳокимияти вакиллик органларини халқнинг чинакам овозига айлантириш борасида барча ҳудуд­ларда кенг қамровли ислоҳотлар шу тарзда изчил давом этмоқда. Бу янгиланишлар, ўз навбатида, маҳаллий кенгашлар фаолияти самарадорлиги, ҳокимларнинг халқ вакиллари олдидаги масъулияти ошишига замин яратди. Пировардида ҳокимликлар фаолияти устидан кенгашлар ва жамоатчилик назорати кучаймоқда.

Бу эса аҳолининг бошқарув жараёнида ўз ҳудудидаги қарорларни қабул қилишда иштирок этган ҳолда жамият манфаатларини ифодалаш ҳамда маҳаллий муаммоларни ҳал қилиш орқали ижтимоий-сиёсий барқарорликка ҳисса қўшишига кенг имкон яратяп­ти. Жамиятимизда кечаётган бундай муҳим янгиланишлар ҳар биримизнинг ҳаёт тарзимизга чуқур сингиб, юртимиз тараққиётини янада юксалтириш, келажак авлодларга озод ва обод ватан мерос қолдиришдек эзгу мақсадларга эришишда барчамизни бир мақсад йўлида бирлаштирувчи куч бўлмоқда.

“Янги Ўзбекистон” мухбири

Баҳор ХИДИРОВА тайёрлади.