Бу — Syntrichia caninervis турига мансуб мох бўлиб, унинг намуналари Хитойнинг шимоли-ғарбий қисмидаги Шинжон-Уйғур автоном районидаги Қурбонтунғит чўлидан тўпланган. Олимлар уни бугунги кунгача кашф этилган энг чўлга чидамли ўсимлик тури деб ҳисоблашади.
Лаборатория синовлари шуни кўрсатдики, мох ҳужайраларидаги намликнинг 98 фоизини йўқотгандан кейин ҳам тиклана олади ва -196 ° C совуққа ва юқори дозадаги гамма нурланишига бардош бера олади.
Мох Хитойнинг "Цинчжоу" юк кемасида микрогравитация ва космик нурланиш шароитида синовдан ўтказилди ва чидамлилигини исботлади. Орбитадаги қуриган намуналар озгина сув берилганда қайта тикланди, деб хабар берди Kazinform.
— Бу бутун ўсимликнинг Ернинг паст орбитасига олиб чиқилиши ва қайта тикланиши биринчи марта содир бўлмоқда, — деди Хитой Фанлар академиясининг Шинжон экология ва география институти тадқиқотчиси Ли Сяошуан.
Олимларнинг фикрича, мохнинг қайта тикланиш қобилияти чуқур космик тадқиқотлар учун янги йўлларни очади. Унинг генетик материали эса келажакда қурғоқчиликка чидамли экинларни етиштиришга ва чўлланишнинг олдини олишга ёрдам бериши мумкин.
