Маълум қилинишича, 28 июнь куни соат 12:10 да Урганч шаҳрининг «Ал-Хоразмий» кўчасида олиб борилаётган қурилиш ишлари вақтида бир нафар фуқарони тупроқ босиб қолгани ҳақида Хоразм вилояти Фавқулодда вазиятлар бошқармасига хабар келиб тушган.

Воқеа жойига зудлик билан етиб борган ФВБ қутқарувчилари махсус қутқарув жиҳозлари ёрдамида фуқарони тупроқ остидан чиқариб, унга биринчи тиббий ёрдам кўрсатган. Шундан сўнг у тиббиёт ходимларига топширилган.

Маълумотларга кўра, ҳозирда фуқаронинг аҳволи яхши.

Фавқулодда вазиятлар хизмати қурилиш ва ер қазиш ишларини амалга оширишда хавфсизлик қоидаларига қатъий риоя қилиш, шунингдек, тупроқ кўчиши хавфи мавжуд ҳудудларда зарур ҳимоя чораларини кўриш инсон ҳаётини сақлаб қолишнинг муҳим шарти эканини эслатди.