Бугун Бухоро шаҳрида БМТнинг Озиқ-овқат ва қишлоқ хўжалиги ташкилоти (ФАО), Қишлоқ хўжалиги вазирлиги, «Аграр соҳа аёллари» уюшмаси билан ҳамкорликда Ўзбекистон Республикасида 2030 йилга қадар гендер тенгликка эришиш стратегиясида белгиланган вазифалар, эркаклар ва аёлларнинг тенг ҳуқуқлари ва имкониятларини рўёбга чиқариш учун шарт-шароит яратиш, айниқса, қишлоқ аёлларининг манфаатлари ва эҳтиёжларини ҳисобга олган ҳолда чора-тадбир ва ечимлар ишлаб чиқишга қаратилган навбатдаги семинар-тренинг ташкил этилди.
Семинар мамлакат агросаноат мажмуаси вакиллари иштирокида «Инклюзив қишлоқ хўжалиги сиёсатини амалга оширишни қўллаб-қувватлаш» лойиҳаси доирасида ўтказилиб, асосий эътибор қишлоқ хўжалигида гендер ёндашувларининг асослари, гендер масалаларига оид Ўзбекистон миллий қонунчилиги, Ўзбекистон аҳолисининг озиқ-овқат хавфсизлигини таъминлаш ва қишлоқ хўжалигини ривожлантиришда хотин-қизларнинг ролига қаратилди.
Қайд этилганидек, мазкур стратегиядаги йўналишлар БМТнинг 2030 йилгача мўлжалланган Барқарор ривожланиш мақсадларига мувофиқ ҳолда белгиланган.
ФАО Қишлоқ хўжалиги ва мамлакатнинг агросаноат комплекси билан боғлиқ бошқа ташкилотларига аҳолининг ижтимоий заиф қатламлари, айниқса қишлоқ аёлларининг эҳтиёж ва манфаатларини ҳисобга олган сиёсий тадбир ва ечимларни ишлаб чиқиш ва уларни амалга ошириш имкониятларини ривожлантириш ва мустаҳкамлашга ёрдам бермоқда.
Семинар-тренингни юридик фанлари доктори Лола Саидова, халқаро тренерлар Нигора Гаппарова, Гулнора Ишанханова олиб бордилар. Шуни эслатиб ўтиш жоизки, бундай тренинглар мамлакатнинг агросаноат комплекси вакиллари учун аввал Тошкент ва Термезда ўтказилган эди, деб хабар беради Қишлоқ хўжалик вазирлиги матбуот хизмати.
Семинар эртага ҳам ўз ишини давом эттиради.
