Ҳукуматимиз томонидан мактабгача таълим тизимида самарали фаолият олиб бораётган, фарзандларимизни ҳар томонлама етук шахс этиб тарбиялашда улкан ҳисса қўшаётган педагоглар меҳнатини рағбатлантириш, қўллаб-қувватлаш учун қатор ишлар амалга оширилмоқда. 2019 йилдан бери ўтказилиб келинаётган “Йилнинг энг яхши тарбиячиси” касбий кўрик-танлови бунинг яққол мисолидир.
2022-йилнинг 20-21 октябр кунлари Тошкент шаҳридаги Пучон университетида “Йилнинг энг яхши тарбиячиси-2022” республика касбий кўрик-танлови ташкил этилди.
Республика босқичида кўрик танловнинг вилоят босқичларида ғолибликни қўлга киритган жами 70 нафар педагог (ҳар бир ҳудуддан 5 нафардан) 5 та номинацияси бўйича ўз куч ва маҳоратини синади. “Энг яхши методист тарбиячи”, “Энг яхши креатив тарбиячи”, “Инновацион ва ахборот технологияларини қўллайдиган энг яхши тарбиячи”, “Энг яхши лойиҳа муаллифи”, “Моҳир қўл устаси” каби номинацияларида учун беллашув қизғин кечди.
Биринчи, иккинчи ва учинчи ўринни олган қатнашчилар кўрик-танловнинг белгиланган пул мукофотлари билан рағбатлантирилди.
Жумладан:
1-ўринни олган 5 нафар ғолибнинг ҳар бирига – 11 000 000 сўм;
2-ўринни олган 5 нафар ғолибнинг ҳар бирига – 7 000 000 сўм;
3-ўринни олган 5 нафар ғолибнинг ҳар бирига – 4 500 000 сўм.
Бундан ташқари, танловнинг республика босқичида ҳар бир номинация бўйича биринчи, иккинчи ва учинчи ўринларни эгаллаган ўрта махсус, касб-ҳунар маълумотига эга бўлган ғолиблар Ўзбекистон Республикаси олий таълим муассасаларининг “Мактабгача таълим” йўналишига ўқишга киришда имтиёзга эгалиги эълон қилинди.
Шунингдек, танловнинг республика босқичида қатнашаётган барча иштирокчилар қимматбаҳо совғалар ва ташаккурномалар билан тақдирланишди.
