Шунингдек, Расул Хўжаевнинг 14 ёшли қизи Севинчой Холбоева аллақачон ота касбини пухта ўзлаштириб олган. У кандакорлик асбоб-анжомларини моҳирлик билан ишлатиб, мустақил равишда мис қумғонларни ясаб, ҳатто жимжимадор безаклар билан безатиб, ички бозорга олиб чиқмоқда. Шу билан бирга, тунукасозлик ҳунарига қизиқувчи мактаб ўқувчиларига ўзи эгаллаган ҳунар сирларини ўргатмоқда.
Расул аканинг ўғли Русланбек Холбоев 7-синфда, қизи Севинчой Холбоева эса 8-синфда ўқийди. 13 ёшли Русланбек ўқишдан бўш пайтлари отасига ёрдам берса, Севинчой икки йилдан буён мустақил фаолият олиб боради. Севинчой ҳозир 14 ёшда. Ҳунармандчиликни отасидан 2 йилда тўлиқ ўрганиб олган Севинчойнинг айтишича, соҳага қизиқиш 6-7 ёшларида бошланган.
“Отамга 6 ёшимда шогирдликка тушганман. Охирги икки йилда соҳани аниқ ўрганишга киришдим. Бошида 2-3 ойгача шунчаки жараённи кузатиб юрдим. Кейин нимадир ясашга ўтдим. Очиғини айтаман, уч-тўрт уринишлардан кейингина ишим ўхшашни бошлади. Унгача анча металл бўлакларини яроқсиз қилиб қўйганман”, — дейди Севинчой Холбоева.
Ёш ҳунарманд қиз икки йилдан буён мустақил фаолият олиб боради. Севинчой ҳозирда 20 га яқин уй-рўзғор буюмлари ва тунука ишлаб чиқармоқда. У ўзига уй ичида алоҳида устахона очиб олган. Отаси Расул аканинг айтишича, қизи ишлаётган пайтда ҳеч ким безовта қилиши мумкин эмас. Севинчой бир ўзи, мустақил ишлашни яхши кўрар экан.
Ҳунарманд қиз Севинчойнинг айтишича, кунлик даромади 100-150 минг сўм атрофида. Ўқиш бўлмаган кунлари бу рақам 200 минг сўмгача етиши ҳам мумкин экан. У эрталаб соат 5:00 да туришга одатланган. Биринчи қиладиган иши — устахонасини очиб, тозалаш.
Халқимиз томонидан: “Ҳунарманднинг ризқи баланд”, “Ҳунарли инсон хор бўлмас”, деган ҳикматлар бежизга яратилмаган. Ҳар бир инсонга эгаллаган касб-кори, илм-у ҳунари унинг ҳам умрини, ҳам қалбини безайди. Ризқ-у насибасини бутун қилиб, ҳаётига кўркамлик бахш этади.
Минажатдин КУТЛИМУРАТОВ,
“Янги Ўзбекистон” мухбири
