Устозимиз Халқ депутатлари Жиззах шаҳар Кенгаши депутати ЎзЛиДеП аъзоси Абдулазиз Хужаков бугун куйиб-ёниб биз шогирдларини халқ қалбига қулоқ солишга, одамларнинг дарду-ташвишларини астойдил тинглашга, муаммоларини ҳал этишда амалий ёрдам беришга даъват этиб келяпти. Ва бу борада ўзи ҳам айрим амалдорларнинг онгида тошдай қотиб қолган эскича қарашларини таг-томири билан қўпориб, унинг ўрнига халқ талаб ва истаклари асосида ишлаш принципларини ҳаётимизда жорий этишга қатъият билан ҳаракат қилиб келади. Ҳатто ўзлари бетоб бўлиб қолганларида ҳам халқнинг ҳақиқий муаммолари билан қизиқиб, уларнинг дарди билан яшаётган устозимизнинг меҳнатлари Ўзбекистон Республикаси Олий Мажлис Сенати томонидан таъсис этилган «Халқпарвар депутат» мақоми ҳамда Мустақиллигимизнинг 30 йиллик эсдалик нишони билан ўз самарасини кўрсатди. Устозимизнинг бу ютуқлари бизни янада илдамроқ ва ғайрат билан ишлаш учун мотивация бўлди десак муболаға бўлмайди.
Ҳар қандай депутат ҳам адолатсизлик ҳолатлари, халқни қийнаб келаётган оғир муаммоларни рўй-рост кун тартибига қўйиб, «камчиликларни бартараф этайлик», деб, бунда аввало ўзи ўрнак ва намуна бўлиб, жон-жаҳди билан бу ишга киришавермайди. Бунинг учун инсонда катта юрак бўлиши, ўз халқи, Ватани тақдири учун масъулиятни чуқур ҳис эта билиши керак. Биз шогирдларида ана шундай туйғуни шакллантира олган, халқнинг дарди билан яшашга ўргата олган, устозимизга раҳмат айтамиз.
Ахир кимдир умид билан ҳоким ё вазирнинг олдига борсаю, қабулига кира олмаса, эшигида ҳафталаб-ойлаб сарғайса, шундан сўнг қўли бирор ишга борадими? Ёшларчи? Улар билан ҳеч ким гаплашмаса, кўнглида нима гапи бор – қизиқмаса, уларни ўз «тарбияси»га олишни пойлаб ўтирган сохта тарбиячи, «ҳожатбарор»лар камми?!
Агар устозлар бугун ёшларимиз тарбияси билан астойдил шуғулланмаса, уларнинг қалбига қулоқ тутмаса, бу иш билан хорижда қармоқ ташлаб ўтирган бошқалар шуғулланади. Бу – ҳаётий ҳақиқат. Уни ортиқча исботлаб ўтиришга ҳожат йўқ.
Халқ дарди билан яшаш, халққа хизмат қилишдек олий мақсад йўлида ёшларни ўз атрофида бирлаштира олган депутат барчага ўрнак бўлувчи ҳақиқий устоздир!!!
Барно Кушбакова,
Тошкент архитектура қурилиш институти магистранти,
Аббосбек Рахмонов,
Тошкент тўқимачилик ва енгил саноат институти талабаси,
Нилуфар Абдуғаниева,
Жиззах политехника институти талабаси.
