Қолаверса, ЖССТ тавсиялари ва қатор мамлакатлар тажрибаси ҳам коронавирус тарқалишини кескин пасайтириш ва ўлим ҳолатларининг олдини олишда бустер доза билан эмланиш самарали эканлигини кўрсатяпти.
Шу сабабли мамлакатимизда тўлиқ вакцина курсини якунлаган, ўз навбатида, эмлашнинг биринчи дозасини олганига 6 ой ва ундан ортиқ вақт бўлган аҳоли қатлами қўшимча доза билан эмланяпти.
Таҳлилларга кўра, 2021 йил 1 апрелдан 1 августгача юртимизда биринчи доза вакцина билан эмланган фуқаролар жорий йил февраль ойигача биринчи дозани олганига 6 ой ва ундан ортиқ вақт бўлган аҳоли қатламига кириб, улар 5,2 миллион нафарни ташкил этди. Шулардан 733,8 минг нафари бугунгача бустер доза билан эмланди.
Мутахассисларнинг фикрича, бустер доза вакцина билан эмланиш «альфа», «дельта» штаммларидан ташқари, «омикрон»дан ҳам ҳимоя қила олади. Мабодо касаллик юқиб қолгудек бўлса ҳам, у жиддий асоратларсиз, енгил ўтиб кетади.
Эслатиб ўтамиз, аввалроқ, Зангиота юқумли касалликлар шифохоналарига январь ойида жами 8 601 нафар бемор мурожаат қилгани, уларнинг 8 243 нафари коронавирусга қарши вакцина олмагани, бор-йўғи 358 нафари COVID-19 га қарши эмлангани, вакцина олмаганларда касаллик оғир ва ўта оғир даражада кечиб, ҳатто, ўлим ҳолатлари кузатилаётгани ҳақида хабар берган эдик, деб хабар беради Соғлиқни сақлаш вазирлиги матбуот хизмати.
