Форум давомида компания АҚШнинг 77 Construction USA Corp., Хитойнинг China Huaneng Group, Ҳиндистоннинг Adani Group, Япониянинг MUFG Bank, Германиянинг AKA Bank, Хорватиянинг Koncar ва In Foro Viridi компаниялари, Жаҳон банки гуруҳи ҳамда Афғонистон Ташқи савдо вазирлиги вакиллари билан икки томонлама музокаралар ўтказди.
Учрашувларда гидроэнергетика тармоғига йирик инвестицияларни жалб этиш, давлат-хусусий шериклик механизмларини кенгайтириш, халқаро молиявий институтлар билан ҳамкорликни мустаҳкамлаш ҳамда замонавий технологияларни жорий этиш масалалари муҳокама қилинди.
Музокаралар якунларига кўра, қатор амалий келишувларга эришилди. Жумладан, 77 Construction USA Corp. билан EPC+F ва давлат-хусусий шериклик форматларида ҳамкорликни кенгайтириш, шунингдек, Пском ГЭС лойиҳасида иштирок этиш бўйича келишувга эришилди.
Жаҳон банки гуруҳи билан Хўжикент ГАЭС лойиҳасини ривожлантириш, MIGA кафолат механизмларидан фойдаланиш ва грант дастурларини жалб қилиш йўналишларида ҳамкорликни кенгайтириш бўйича келишиб олинди.
China Huaneng Group билан давлат-хусусий шериклик асосида йирик инвестиция лойиҳаларини амалга ошириш бўйича ҳамкорлик меморандуми имзоланди. Adani Group билан эса қўшма ишчи гуруҳ тузиш ҳамда истиқболли лойиҳаларни биргаликда ишлаб чиқиш бўйича келишувга эришилди.
Шунингдек, MUFG Bank ва AKA Bank билан йирик энергетика лойиҳаларини узоқ муддатли молиялаштириш механизмлари муҳокама қилинди. Хорватиянинг Koncar ҳамда In Foro Viridi компаниялари билан кичик ва ўрта гидроэлектр станциялари лойиҳаларини амалга ошириш бўйича ҳамкорлик йўлга қўйилди.
Бундан ташқари, Афғонистон томони билан гидроэнергетика ускуналарини етказиб бериш ва лойиҳалаш соҳаларида ҳамкорликни ривожлантириш юзасидан келишувларга эришилди.
«Ўзбекгидроэнерго» АЖ таъкидлашича, мазкур форум компаниянинг халқаро ҳамкорлик географиясини янада кенгайтириш, стратегик инвестиция лойиҳаларини амалга ошириш ва гидроэнергетика тармоғини замонавий молиявий ҳамда технологик ечимлар асосида ривожлантириш учун мустаҳкам замин яратди.
