Бу ҳақда Ўзбекистон Республикаси Қишлоқ хўжалиги вазирлиги ҳамда Фермерлар кенгаши маълум қилди.

Қайд этилишича, бугунги кунда глобал иқлим ўзгариши ва экологик мувозанатнинг бузилиши натижасида чорва ҳайвонлари ўртасида янги касалликлар пайдо бўлиш хавфи ортиб бормоқда. Хусусан, хорижий давлатларда чорва моллари орасида оқсил (яшир) касаллигининг тарқалиш эҳтимоли юқори экани таъкидланмоқда.

Жаҳон ҳайвонлар соғлиги ташкилоти маълумотларига кўра, 2025–2026 йилларда 48 та давлатда ушбу касалликнинг янги “SAT” турлари аниқланган. Мавжуд вакциналар эса ушбу турларга қарши тўлиқ ҳимояни таъминламаслиги мумкин. Шу боис, касалликнинг олдини олишда ҳар бир фермер ва чорвадорнинг масъулияти ва фаол иштироки муҳим аҳамият касб этади.

Мутахассислар хўжаликларда қуйидаги ветеринария-санитария талабларига қатъий амал қилишни тавсия этмоқда:

  • кириш жойларида дезинфекция воситаларини ташкил этиш;
  • бегона шахслар ва транспорт воситаларининг киришини чеклаш;
  • ҳайвонларни зоогигиеник талаблар асосида парваришлаш;
  • сифатли озуқа ва тоза сув билан таъминлаш;
  • ҳудудда доимий тозаликни сақлаш ва зарарли жониворларга қарши курашиш.

Агар ҳайвонларда касаллик аломатлари кузатилса, уларни зудлик билан бошқалардан ажратиш, ветеринар келгунига қадар изоляция қилиш ва мустақил равишда дори қўлламаслик лозим.

Оқсил касаллигининг асосий белгилари — юқори ҳарорат, оғиз бўшлиғи ва туёқларда яралар, елинда шикастланишлар ҳисобланади. Бундай ҳолатларда дарҳол ветеринарга мурожаат қилиш, биноларни дезинфекция қилиш, ҳайвон маҳсулотларини ҳудуддан ташқарига чиқармаслик ва сутни қайнатмасдан истеъмол қилмаслик зарур.

Мутахассислар таъкидлашича, касалликнинг олдини олишда эмлаш энг самарали чора ҳисобланади. Қорамоллар йилда икки марта (баҳор ва кузда), қўйлар эса йилда бир марта эмланиши керак. Зарур ҳолларда 2,5–3 ойликдан катта барча ҳайвонлар мажбурий эмланади ва 15–21 кун ичида иммунитет шаклланади.

Шунингдек, ҳар қандай шубҳали ҳолатларда (71-202-12-00, ички: 210, 218, 323) рақамлари орқали мутахассисларга мурожаат қилиш сўралди.

Маълум қилинишича, чорва саломатлигини сақлашда тозалик ва ветеринария қоидаларига амал қилиш энг муҳим омил бўлиб, бу юқори маҳсулдорлик ва барқарор даромад гаровидир.

Касалликнинг олдини олиш бўйича тавсиялар билан қуйидаги ҳавола орқали танишиш мумкин: