Президентнинг 20 августдаги қарори билан Муҳаммад ал-Хоразмий номидаги Тошкент ахборот технологиялари университети ҳузуридаги Радиоэлектрон тизимлар ва ахборот технологиялари маркази негизида Ўзбекистон Республикаси Криптология, ахборот хавфсизлиги ва инновацион технологиялар институти ташкил этилди.

Институтнинг асосий вазифалари қаторига криптология, ахборот хавфсизлиги ва киберхавфсизлик, сунъий интеллект, катта ҳажмдаги маълумотларни қайта ишлаш, рақамли криминалистика ҳамда рақамли технологиялар соҳаларида кадрларни қайта тайёрлаш ва уларнинг малакасини ошириш киради.

Шунингдек, институт ахборотни ҳимоя қилиш, сунъий интеллект, рақамли криминалистика ва бошқа долзарб йўналишларда илмий-тадқиқот ҳамда тажриба-конструкторлик ишларини ташкил этади. Давлат буюртмалари доирасида инновацион лойиҳаларни ишлаб чиқиш ва амалга оширишда ҳам иштирок этади.

Янги институтга криптография ва техник ҳимоя воситаларини ишлаб чиқиш, ишлаб чиқариш, реализация қилиш ва сертификатлаш, шунингдек, муҳим ахборот инфратузилмаси объектларини киберхавфсизлик талабларига мувофиқ экспертизадан ўтказиш ваколатлари ҳам берилган.

Қарорда институтга соҳа бўйича олий таълимдан кейинги таълим тизимини ташкил этишга ҳам рухсат берилган. Бундан ташқари, хорижий фуқароларни ҳам белгиланган тартибда жалб этиш мумкин.

Институт ходимлари учун яна бир муҳим имконият — Тошкент вилояти ҳудудидан биринчи бозордан уй-жой сотиб олиш учун ипотека кредити ажратилиши. Бунда дастлабки бадал уй-жой қийматининг камида 15 фоизи миқдорида белгиланади, кредит эса тижорат банкларининг ўз маблағлари ҳисобидан 20 йил муддатга ажратилади.

Шунингдек, институтнинг моддий-техник базасини мустаҳкамлаш мақсадида у томонидан ишлаб чиқариладиган техник воситалар ва кўрсатиладиган хизматлар таннархига 25 фоизгача устама жорий этиш мумкин.

Институтнинг бюджетдан ташқари ривожлантириш жамғармаси ҳам ташкил этилади. Унинг маблағлари институтнинг моддий-техник базаси, ўқув, илмий ва ишлаб чиқариш фаолиятини ривожлантириш, илмий-тадқиқот ва тажриба-конструкторлик лойиҳаларини молиялаштириш ҳамда ходимларни рағбатлантиришга йўналтирилади.

Қарор ижросини назорат қилиш Ўзбекистон Республикаси Бош вазири А.Н. Арипов зиммасига юкланган.