Маълум қилинишича, Ўзбекистон Республикаси Олий Мажлиси Қонунчилик палатаси депутатлари 7 апрель куни бўлиб ўтган йиғилишда мазкур ҳужжатни учинчи ўқишда кўриб чиқди.

Қонун лойиҳаси аёллар ва болаларни зўравонликдан ҳимоя қилиш тизимини янада такомиллаштириш ҳамда айрим жиноятлар бўйича тергов самарадорлигини оширишга қаратилган.

Амалиётда жинсий эркинликка қарши жиноятларни тергов қилиш жараёнида қатор муаммолар сақланиб қолаётгани қайд этилмоқда. Хусусан, айрим ҳолларда қонун нормалари нотўғри қўлланилиши, жабрланувчилар ҳуқуқларининг тўлиқ таъминланмаслиги кузатилмоқда.

Шу муносабат билан, қонун лойиҳасида бундай турдаги жиноятларни тергов қилиш ваколатини прокуратура органларига ўтказиш таклиф этилмоқда. Шунингдек, болаларни зўравонликдан ҳимоя қилиш соҳасида прокуратура ваколатларини кенгайтириш, текширув ва дастлабки терговни олиб бориш, шунингдек жазо ижроси устидан назоратни кучайтириш назарда тутилган.

Бундан ташқари, мансабдор шахслар томонидан содир этилган, айниқса инсон ўлимига олиб келган жиноятларни тергов қилиш амалиётини такомиллаштириш ҳам кўзда тутилмоқда.

Қонунчиликка киритилаётган ўзгартишларга мувофиқ, жинсий эркинликка қарши жиноятлар, айниқса вояга етмаганларга нисбатан содир этилган ҳолатларда жазо ўташ тартибини қатъийлаштириш таклиф этилган. Жумладан, бундай жиноятлар учун ҳукм қилинган шахсларни манзил-колонияларга ўтказмаслик тартиби белгиланиши мумкин.

Муҳокамаларда қайд этилганидек, ушбу ўзгартишлар аёллар ва болалар ҳуқуқларини янада ишончли ҳимоя қилиш, жиноятларни фош этиш ва тергов қилиш сифатини ошириш ҳамда жазонинг муқаррарлигини таъминлашга хизмат қилиши кутилмоқда.