Дар оғози ҷаласа натиҷаҳои ислоҳоти низомӣ, ки солҳои охир дар вилояти Фарғона амалӣ гардидаанд, таҳлил карда шуданд. Бо вуҷуди маҳдуд будани захираҳои замин ва канданиҳои фоиданок, дар минтақа диверсификатсияи иқтисод идома ёфта, рушди устувор дар соҳаҳои саноат, кишоварзӣ, хизматрасонӣ ва технологияҳои иттилоотӣ таъмин гардид.

Аз ҷумла, агар дар соли 2017 ҳаҷми маҳсулоти минтақавии нохолис ба ҳар сари аҳолӣ 7 миллион сӯмро ташкил медод, то соли 2025 он ба 26,6 миллион сӯм расида, 3,8 баробар афзоиш ёфт. Ин аз афзоиши назарраси фаъолияти иқтисодӣ ва даромади аҳолӣ шаҳодат медиҳад.

Дар самти таъмини шуғли аҳолӣ ва ҳифзи иҷтимоӣ низ динамикаи мусбат қайд гардид. Соли гузашта 519 ҳазор нафар бо ҷойи кор таъмин шуданд, ки ин имкон дод даромади онҳо зиёд гардида, 53 ҳазор оила аз рӯйхати камбизоатӣ хориҷ карда шавад. Минбаъд то охири соли 2026 паст кардани сатҳи бекорӣ то 3 фоиз ва камбизоатӣ то 2,7 фоиз пешбинӣ шудааст.

Фаъолияти сармоягузорӣ ва савдои хориҷии вилоят низ афзоиши назаррас нишон дод. Дар вилоят 26 лоиҳаи бузург ва 357 лоиҳаи миёна ва хурди сармоягузорӣ амалӣ гардида, 1,2 миллиард доллар сармояи хориҷӣ ҷалб карда шуд. Ҳаҷми содирот мунтазам меафзояд ва шумораи корхонаҳои содиркунанда зиёд шудааст.

Соли гузашта дар кишоварзӣ дар майдони 94,3 ҳазор гектар 816,7 ҳазор тонна ғалла истеҳсол гардида, ҳосилнокии миёна 86,6 сентнер аз ҳар гектарро ташкил дод. Дар соҳаи пахтакорӣ дар 72 ҳазор гектар 324 ҳазор тонна ҳосил ҷамъоварӣ шуд. Содироти мева ва сабзавот ба 403 миллион доллар расид. Ба туфайли қитъаҳои наздиҳавлигӣ ва гармхонаҳои хурд ҳазорҳо оила манбаи иловагии устувори даромад гирифтанд.

Дар ҷаласа вазифаҳои афзалиятноки рушди вилояти Фарғона муайян карда шуданд.

Қайд гардид, ки барои рушди устувори сармоягузорӣ ва содирот, инчунин кам кардани бекорӣ ва камбизоатӣ, муносибати низомнок ва ҳадафнок зарур аст. Бо ин мақсад барои вилояти Фарғона бастаи лоиҳаҳои нави бузург ба маблағи умумии 8,2 миллиард доллар ташаккул дода шуд.

Аллакай дар ҳамин сол ба роҳ мондани лоиҳаҳо ба маблағи 4,2 миллиард доллар ба нақша гирифта шудааст, ки аз он 2,7 миллиард доллар ба саноат, 210 миллион доллар ба кишоварзӣ ва 1,2 миллиард доллар ба хизматрасонӣ ва сайёҳӣ рост меояд.

Ҳамзамон қайд шуд, ки аз 2 ҳазору 115 гектар замине, ки солҳои охир барои саноат ҷудо шудааст, 40 фоизи он то ҳол ба музояда гузошта нашудааст. Пеш аз ҷудо кардани замини иловагӣ зарур аст, ки инфрасохтори қитъаҳои мавҷуда беҳтар карда шуда, онҳо ба соҳибкорон пешниҳод гарданд.

Дар ҳамин сол таъсиси 98 ҳазор ҷойи кори доимӣ, баланд бардоштани даромади 423 ҳазор нафар ва аз “соя” баровардани 74 ҳазор ҷойи кор ба нақша гирифта шудааст.

Вазифа гузошта шуд, ки ноҳияҳои Бувайда, Учкӯприк, Қува, Ӯзбекистон, Ёзёвон, инчунин шаҳрҳои Марғилон, Фарғона, Қӯқанд ва Қувасой ба ҳудудҳои бидуни бекорӣ ва камбизоатӣ табдил дода шаванд. Зиёда аз 800 миллиард сӯм барои беҳтар намудани инфрасохтор дар 7 ноҳия ва 132 маҳаллаи дорои шароити вазнин равона карда мешавад, то сатҳи бекорӣ ва камбизоатӣ ду баробар коҳиш ёбад. Илова бар ин, дар доираи барномаи “Лоиҳаи маҳалла” бонкҳо ба маблағи 1,4 триллион сӯм қарз ҷудо мекунанд.

Дар соҳаи кишоварзӣ вазифа гузошта шуд, ки содироти мева ва сабзавот бо роҳи содироти маҳсулоти тайёр бо арзиши иловашуда то 510 миллион доллар зиёд карда шавад,. Барои ин бо иштироки сармоягузорони чинӣ дар шаҳрҳои Фарғона ва Қувасой марказҳои агрологистикӣ ба маблағи 175 миллион доллар сохта мешаванд.

Дар ноҳияҳои Ӯзбекистон, Бешариқ ва Олтиариқ ба роҳ мондани 4 лоиҳа ба маблағи 21 миллион доллар дар соҳаи чорводорӣ, коркарди шир ва парвариши чӯҷаҳои зотӣ пешбинӣ шудааст.

Зарурати рушди инфрасохтори иҷтимоӣ мутаносиб бо афзоиши аҳолӣ таъкид гардид. Дар ҳамин сол барои сохтмон ва таъмири 33 мактаб 343 миллиард сӯм ҷудо карда мешавад. Ба роҳбарони минтақаҳо супурда шуд, ки инфрасохторро аз ҳисоби роҳандозии имкониятҳои иловагӣ ва ҷалби сектори хусусӣ беҳтар гардонанд.

Бо мақсади рушди сайёҳӣ дар ноҳияи Сӯх маҷмааҳои сайёҳӣ бо таҷрибаи Угом ва Миракӣ ташкил карда мешаванд, дар ноҳияи Фарғона бошад, минтақаи бузурги сайёҳӣ ва фароғатӣ бунёд мегардад. Дар шаҳри Қӯқанд объектҳои нави сайёҳӣ ва хатсайрҳо аз рӯйи ёдгориҳои мероси фарҳангӣ ташкил мешаванд.

Дар шаҳри Қӯқанд инчунин вазифа гузошта шуд, ки системаи қулайи хизматрасонии давлатӣ дар як ҷо бо роҳи кӯчонидани 17 муассисаи давлатӣ ба массиви “Янги Ӯзбекистон” ташкил карда шавад,

Дар соҳаи технологияҳои иттилоотӣ рушди IT ҳамчун яке аз муҳаррикҳои асосии иқтисоди вилояти Фарғона пешбинӣ шудааст. Ҳоло дар вилоят 139 резиденти IT-парк фаъолият мекунанд. Дар ҳамин сол вазифа гузошта шуд, ки ҳаҷми хизматрасониҳои IT то 3,5 триллион сӯм ва содирот то 30 миллион доллар зиёд карда шавад.

Дар шаҳри Фарғона сохтмони IT-парки нав ва маҷмаа, инчунин татбиқи лоиҳаи “Меросбарони Муҳаммад ал-Хоразмӣ” ба нақша гирифта шудааст. Дар Марғилон донишгоҳи байналмилалии IT сохта мешавад.

Дар ҷамъбасти ҷаласа роҳбари давлат супоришҳои мушаххас дод, ки ҳар як лоиҳа бо масъалаҳои таъмини шуғли аҳолӣ ва баланд бардоштани сатҳи зиндагӣ зич алоқаманд карда, инчунин масъулияти шахсӣ барои иҷрои вазифаҳои гузошташуда тақвият дода шавад.