Манфиатҳои инсон ва тамоюлҳои адолати иҷтимоӣ дар сиёсати давлати мо афзалияти аввалиндараҷа доранд. Пас аз эътирофи мавҷудияти камбизоатӣ дар кишвар системаи паст кардани он ҷорӣ карда шуд. Дар баробари ин дар ибтидои соли равон тамоми ноҳияҳо ба 5 категория тақсим шуда, ба онҳо вобаста ба суръати тараққиёти иҷтимоию иқтисодӣ имтиёзҳои дифференсиалӣ дода шуданд. Дар натиҷаи ин соли гузашта 1 миллион кас ва дар семоҳаи аввали соли ҷорӣ 210 ҳазор кас аз сатҳи камбизоатӣ бароварда шуд.
Ҳар сол барои соҳибкории оилавӣ 13 триллион сӯм вом ва 1,5 триллион сӯм субсид ҷудо карда мешавад. Феҳристи ҳифзи иҷтимоии кумаки моддӣ 2,3 миллион оилаҳои камтаъмин, занон, пиронсолони танҳо ва маъюбонро дар бар мегирад.
Аммо ин натиҷаҳо кифоя нестанд. Паст кардани сатҳи камбизоатӣ вазифаи мураккабест, ки ба ташаккули рӯҳияи соҳибкорӣ дар байни аҳолӣ, касбомӯзӣ ва зиёд намудани шумораи ҷойҳои корӣ нигаронида шудааст.
Ба ин муносибат дар ҷамъомад масъалаи гузаштан ба марҳилаи нави кор дар соҳаи бо кор таъмин намудани аҳолӣ муҳокима карда шуд.
Дар панҷ соли охир шумораи субъектҳои соҳибкорӣ дар мамлакати мо аз 285 ҳазор ба 590 ҳазор нафар расид. Ин маънои онро дорад, ки дар як ноҳия ба ҳисоби миёна зиёда аз 2,5 ҳазор ва ё дар як маҳалла 50 соҳибкор ба вуҷуд омадааст. Ҳамкории мутақобилан судманд бо бахши хусусӣ бо дасгирӣ намудани онҳо метавонад имкониятҳоро барои ҳалли масъалаҳои шуғли маҳаллӣ густариш диҳад.
Масалан, давлат барои касбомӯзии аҳолӣ ҳар сол 200 миллиард сӯм ҷудо мекунад. Аммо ин маблағҳо бо ниёзҳои воқеии соҳибкорон ба мутахассис алоқаманд нестанд. Ба ҳамин тариқ, ба соҳибкорон лозим меояд, ки ҳар сол барои тайёр кардани ҳазорҳо мутахассис барои худ маблағи зиёд сарф мекунанд ва дар ин раванд аз давлат кумак намегиранд.
– Қарори ягонаи дуруст ин фароҳам овардани шароит барои соҳибкорон ва ҳамкории судманд бо онҳост. Аз ҳисоби ин мо шуғлро таъмин намуда, мутахассисони соҳибихтисос тайёр мекунем, — гуфт Шавкат Мирзиёев.
Бо ин мақсад аз 1 июн татбиқи барномаи «20 ҳазор соҳибкор – 500 ҳазор мутахассиси соҳибихтисос» оғоз мегардад. Иштирок дар барнома ихтиёрӣ аст. Дар маҷмӯъ барои солҳои 2023-2024 барои ин барнома 1 миллиард доллар ҷудо мешавад. Маблағҳои мазкур барои додани қарз ба соҳибкорони ширкаткунанда бо фоизҳои камтар ва ба мӯҳлатҳои дарозтар бо шарти омӯзиш ва шуғли шаҳрвандон аз оилаҳои камбизоат истифода мешаванд. Хароҷоти соҳибкорон барои ташкил ва таҷҳизонидани «мономаркази амалӣ», инчунин омӯзиши касбҳо пурра ҷуброн карда мешавад.
Ба соҳибкороне, ки дар ин барнома иштирок мекунанд, имтиёзҳои махсуси андозӣ дода мешаванд. Аз ҷумла, субъектҳои соҳибкорӣ, ки на камтар аз 20 дарсади кормандони онҳо шаҳрвандони оилаҳои камбизоат буда, дар давоми сол кор мекунанд, аз пардохти андози молу мулк ва замин озод карда мешаванд. Барои соҳибкороне, ки то 5 миллион сӯм маош медиҳанд, ставкаи андози иҷтимоӣ 2 баробар кам карда мешавад. Ва узви оилаи камбизоат, ки дар чунин корхона кор мекунад, аз андози даромад озод мешавад.
Афзалиятҳои андоз ва гумрук низ вуҷуд доранд. Аз ҷумла, фаъолияти чунин соҳибкоронро мақомоти андоз тафтиш намекунанд. Баргардонидани андоз аз арзиши иловашуда ва андозҳои зиёдатӣ пардохташуда бидуни санҷиш сурат мегирад. Пардохти қарз аз рӯи ҳамаи намудҳои андоз метавонад то як сол ба таъхир андохта шавад. Ҳангоми барасмиятдарории гумрукӣ ба соҳибкорон “долони сабз” татбиқ мешавад.
Ба соҳибкороне, ки дар барнома иштирок мекунанд, ҳангоми дастрасӣ ба инфрасохтор, замин ва биноҳо имтиёзҳои иловагӣ дода мешаванд. Масалан, онҳо метавонанд барои қитъаҳои замин, биноҳо ва иншоотҳои хусусигардонидашуда қисм-қисм пардохт кунанд. Хароҷоти инфрасохтори лоиҳаҳо, ки ба маблағи зиёда аз 50 миллиард сӯм аст, аз ҳисоби давлат пурра таъмин карда мешавад.
Дар ҷаласа гуфта шуд, ки дар заминаи низоми нав имсол имкони омӯзиш ва аз фақр баровардани 550 ҳазор нафар фароҳам оварда мешавад.
Тавре ки маълум аст, Чин дар соҳаи паст кардани сатҳи камбизоатӣ таҷрибаи зиёд дорад. Дар асоси ин таҷриба дар ҳар як вилояти кишвари мо барномаи алоҳидаи мубориза бо камбизоатӣ амалӣ карда мешавад. Дар он ба беҳбуди инфрасохтори нақлиёти роҳи автомобилгард, энергетика, коммуникатсия ва сайёҳӣ, рушди шаҳрҳои хурду миёна, индустрикунонии маҳаллаҳои минтақаҳои сатҳи камбизоатӣ баланд таваҷҷуҳ зоҳир карда мешавад. Зимнан зикр гардид, ки аз ин баъд барномаҳои давлатии сармоягузорӣ, ки ҳамасола тасдиқ мешаванд, ҳамин гуна шакл хоҳанд гирифт.
Ба шахсони масъул супориш дода шуд, ки барномаи фарогири аз камбизоатӣ баровардани 14 ноҳияи интихобшударо таҳия кунанд. Дар ҷамъомад вазирон, роҳбарони соҳаҳо ва ҳокимони вилоятҳо дар бораи нақшаҳо оид ба ташкили кор дар асоси низоми нав маълумот доданд.
