Барномаи сафар дар шаҳри Куала-Лумпур баргузории гуфтушунидҳои дуҷониба бо Сарвазир Анвар Иброҳим, вохӯриҳо бо роҳбарони баландпояи ширкатҳои пешбари малайзиявӣ, иштирок дар форуми муштараки соҳибкорон ва дигар чорабиниҳоро дарбар мегирад.
Рӯзномаи мулоқотҳои сатҳи олӣ масъалаҳои таҳкими минбаъдаи амиқсозии муносибатҳои дӯстонаи Ӯзбекистон ва Малайзия, густариши ҳамкориҳои амалӣ, аз ҷумла, чунин соҳаҳои афзалиятнок, ба монанди тиҷорат, сармоягузорӣ, инноватсия, ҳамкориҳои технологӣ, нафту кимиё, электроника, энергетикаи "сабз", кишоварзии "оқил", сайёҳӣ ва дигар бахшҳоро фаро мегирад. Ба фаъолсозии мубодилаҳои фарҳангиву гуманитарӣ низ диққати махсус дода мешавад.
Сарони ду давлат ҳамчунин масоили муҳими сиёсати байналмилалӣ ва ҳамкории минтақавиро баррасӣ хоҳанд кард.
Тибқи натиҷаҳои ин сафар, қабул намудани Изҳороти муштарак ва бастаи муҳими созишномаҳо, ки ба рушди минбаъдаи шарикии фарогири ду кишвар нигаронда шудааст, дар назар аст.
Қобили зикр аст, ки дар арафаи ин сафари расмӣ дар Малайзия як қатор чорабиниҳои муҳим баргузор мешаванд.
Аз ҷумла, мулоқоти марказҳои таҳлилӣ ва пажӯҳишӣ аллакай сурат гирифт. Дар рӯзҳои наздик намоишҳои имкониятҳои сайёҳӣ ва мероси фарҳангии Ӯзбекистон, форуми ректорони донишгоҳҳои пешбари ҳар ду кишвар ва дигар чорабиниҳо доир хоҳанд шуд.
